Ձեր վստահելի աղբյուրը

«Ընդամենը կարող եմ հավաստիացնել, որ որևիցե կոռուպցիոն բնույթի երևույթների հետ ոչ առնչություն եմ ունեցել, ոչ էլ։ Իմ առաջնային խնդիրը հենց կոռուպցիայի դեմ պայքարն է»,-կառավարության շենքի դիմաց պատասխանելով լրագրողների հարցերին՝ ասաց ՔԿ նորանշանակ նախագահ Արթուր Պողոսյանը։

Նա հայտնեց, թե ընդհանրապես տեղյակ չէ իր անվան հետ կապված կոռուպցիոն պատմություններից, որի մասին հայտարարել է Նիկոլ Փաշինյանը։

Պատասխանելով Արգիշտի Քյարամյանի հեռացման պատճառների մասին հարցին՝  Պողոսյանն ասաց, թե յուրաքանչյուր պետական ծառայողի պաշտոնը հավերժ չէ, մի օր պաշտոնավարում են և մի օր պետք է պատրաստ լինեն լքել այդ պաշտոնը:

«Ես պատրաստ եմ ծառայել երկրին, այնքան ժամանակ, քանի դեռ իմ կարիքը երկիրը, պետությունը և երկրի ղեկավարությունն ունի»,-նշեց նա։

Նա ասաց, որ եթե հանրության շրջանում արդարության զգացողությունը չլինի, ուրեմն խնդիր կա:

«Յուրաքանչյուր հուզող հարց, յուրաքանչյուր քրեական վարույթ, անկախ իր բնույթից, տեսակից, հնչեղությունից, բնականաբար Քննչական կոմիտեի նախագահի ուշադրության կենտրոնում է հայտնվելու և դա ունենալու է որևիցե տեսակի ավարտ։ Ցանկացած գործի բնույթը նշանակություն չունի, կարող է լինի խոշտանգման հետ կապված քրեական վարույթ, կարող է լինի սովորական կենցաղային վեճ և այլն, դա բնականաբար այդ բոլոր քրեական վարույթներն էլ հայտնվելու է մեր ուշադրության դաշտում։  Հիմա, ես պատրաստ չեմ այսօր կոնկրետ քրեական վարույթներ քննարկել ձեզ հետ, մանավանդ այս իրավիճակում»,-ասաց Պողոսյանը և վստահեցրեց, թե ինքը ոչնչով կաշկանդված չէ: