Ձեր վստահելի աղբյուրը

«Ես էապես տարբերվող դիրքորոշում չեմ հայտնել, ուղղակի ես իմ տեսակով չեմ կարող չարտահայտել այն, ինչ որ ես մտածում եմ»,- ԱԺ-ում լրագրողների հետ զրույցում ասաց անկախ պատգամավոր Գեղամ Նազարյանը:

Նրա խոսքով, դա բերեց նրան, որ իր հայտարարությունները տեղի-անտեղի, անհարկի մեկնաբանությունների տեղիք էր տալիս, հարվածի տակ էին դնում խմբակցությանը։

«Իսկ ինչու եմ նման մեկնաբանություններ անում, որովհետև չեմ կարող չանել մեկնաբանություն»,- նշեց նա։

Հարցին՝ կարծում է, ընդդիմությունը օրակարգը փոխե՞լ է, նա պատասխանեց. «Ոչ թե օրակարգը փոխել է։ Ես սիրում եմ և կողմ եմ այն տեսակետին, որ  պետք է մարդու հետ լինել անկեղծ, ազնիվ, մարդուն դատարկ ու անհիմն հույսեր չտաս։

«Հայաստան» խմբակցությունը, հատկապես «Հայաստան» դաշինքի առաջնորդը պետական մտածողություն ունեցող մարդիկ են։ Խնդիրը հետևյալն է. երբ որ ես արտահայտում եմ  ինչ-որ մի կարծիք կամ բարձրաձայնում եմ, իմ ընկերները  հարվածի տակ են դնում, ասում են՝ տարատեսակ,  կեղծ մանիպուլյացիոն մեկնաբանություններ են անում, որոնք խմբակցությանը հարվածում են։

Հայտնի հարցազրույցից օրինակը բերեմ։ Ինձ ասում են՝ դուք եկել եք խորհրդարան, որ հանեք Նիկոլին։ Ես ասում եմ՝ չէ, ընկեր։ Այդ «չէ ընկեր»-ը կտրում են, ասում են՝  Գեղամ Նազարյանն ասաց՝ չէ։ Ես ասում եմ՝ մենք Նիկոլ Փաշինյանին  հեռացելու, պաշտոնազրկելու  խնդիր էինք դնում  դեռ մինչև խորհրդարանական ընտրություն, դրա համար էինք պայքարում։ Մենք դրա համար էինք պայքարում, այդ պայքարը բերեց նրան, որ հասանք արտահերթ ընտրություններին։ Մենք խորհրդարանական ընտրություններին մասնակցել ենք, որ ձևավորենք իշխանություն։ Պարզվեց, որ դու ընդդիմություն ես։ Երբ մանդատը վերցնում ես, պետք է համադրես երկու աշխատանք իրար հետ՝ այն օրակարգը, որ շարունակես պնդել՝  Նիկոլի ղեկավարումը, այսինքն վարչապետի պաշտոնում լինելը վնաս է հասցնում երկրին։ Դա շարունակում ես պնդել, ասել, ճնշում գործադրել կառավարության վրա, նաև այդ նոր  գործիքակազմը օգտագործելով՝ հանրությանը պետք է ապացուցես, որ սիրելի հանրություն, սիրելի 680 հազար ընտրող, դուք սխալ որոշում եք կայացրել»։

Նա նշեց նաև. «Ոմանց ակտիվ աշխատանքն է, որ եկանք, հասանք այս կետին, որ ես ստիպված պետք է անկախ պատգամավոր մնամ։ Ներսից չէ։ Այն ուժերը, որոնք անդադար իմ դեմ սկսեցին պայքարել»։

Հարցին՝ «դուք Նիկոլ Փաշինյանի՞ն եք համարում ծանր կորուստների, ողբերգության, արհավիրիք, գլխավոր մեղավորը, պատասխանատուն», Գեղամ Նազարյանը պատասխանեց. «Ոչ միայն նրան։ Նրան և ոչ միայն նրան»։ 

Հարցին՝ «դուք ո՞ւմ եք համարում պատերազմի պատասխանատուն,  բացի Նիկոլ Փաշինյանից», Գեղամ Նազարյանը պատասխանեց. «Այդ մասին ես կխոսեմ հետո, հիմա չեմ ասի։ Ինչո՞ւ չեմ գնում իրավապահներին հայտնեմ։ Որովհետև անիմաստ է այսօր, մենակ կցավացնեմ ծնողներին։ Այդ մասին խոսելու եմ այն պահին, երբ զգամ, որ իմ խոսելը, ասելը այս երկրին մի գրամ օգուտ կտա։

Հեշտ է, չէ՞, ասենք՝ միակ մեղավորը Նիկոլն է, անցնենք, գնանք։ Մեզ բերել, հասցրել են նրան, որ մեկ հոգի կարող է որոշել մի ազգի ճակատագիր, բա մնացածն ի՞նչն էին անում։ Իհարկե, Նիկոլ Փաշինյանը ծանր մեղավոր է, շատ մեծ մեղավարություն ունի, բայց դա չի նշանակում, որ ինքը մենակ է եղել, կամ ինքը մենակ է բերել։ Եթե այս փաստը վերցնենք ու շարունակենք առաջ, մենք մի նոր աղետ ենք փորում մեր առաջ։ Ես սա հասկացա  երկար ուսումնասիրություններից հետո»։ 

Լրագրողի դիտարկմանը՝ «ինչ որ պահի մարդկանց կփորձեք բացատրել, որ պատերազմի միակ մեղավորն ու պատասխանտուն Նիկոլ Փաշինյանը չէ», նա ասաց. «Այո։ Չգիտեմ, երբ կանեմ։ Կախված է՝ երկրի իրավիճակից»։