Ձեր վստահելի աղբյուրը

«Որքան քաոտիկ և ողբերգական են մեր իրականությունն ու մեզ շրջապատող աշխարհքաղաքական զարգացումներն, այնքան սյուռեալիստական է և ոչ ադեկվատ իշխանության պահվածքը»,- Ազգային ժողովում հայտարարությունների ժամին ասաց «Հայաստան» խմբակցության պատգամավոր Լիլիթ Գալստյանը։ 

Ըստ նրա, բնականաբար, արժեզրկված չափանիշների, բացակա բարոյականության, համատարած ստի ու  թերուս  կառավարիչների միջավայրում  գնալով խորանում է պարտության մատնված հասարակության ապատիան:

«Այնքան են բթացել մեր հանրային ազդակները, որ որպես ընթացիկ իրողություն է ընկալվում քաղաքական մեծամասնության հերթական պատգամավորի թմրանյութի սկանդալը։ Իսկ նա  ոչ միայն չի հրաժարվում մանդատից, այլև շարունակում  է հանրապետության երկրորդ քաղաքը ղեկավարելու հավակնություն ունենալ։

Այնքան են բթացել մեր հավաքական զգայարանները, որ հեծանիվ ու մետրո քարոզող պոպուլիստական թիմի 9 տոկոսանոց քաղաքապետը՝ հարաճուն արտաքին պարտքի պայմաններում,  17 հազար դոլարանոց տոմսով է մեկնում ԱՄՆ, այն պարագայում, երբ մայրաքաղաքը մատնված է տրանսպորտային կոլապսի: 

Հայրենազրկված արցախահայության սոցիալական ծրագրերը կրճատող, թոշակ ու աշխատավարձ չբարձրացնող երկրում՝  բյուջեից  1,4 միլիոն դոլար է հատկացվում  ամանորի հերթական անբովանդակ ծրագրին՝ երրորդ տարին անընդմեջ խոշտանգելով  հանրապետական նշանակության հուշարձանը։ 

Հազար ու մի անվտանգային առաջնահերթություն ունեցող երկրում 8 միլիոն դոլար էլ  բառիս բուն իմաստով քամուն է տրվում   հանուն ինչ որ անպտուղ արբանյակային ծրագրի:
Հարկատուների հաշվին մի  6 միլիոն էլ թմրամիջոցների քարոզիչ Սնուպ Դոգի սիրույն եք քամուն տալիս և դարձյալ թողնում անհետևանք:
Կարևորը տեսարանն  է, այն էլ՝ պատերազմի իրական սպառնալիքի ներքո»,- ասաց ընդդիմադիր  

Նա նշեց, որ իշխանությունները Հռոմի Ստատուտը վավերացնելիս հայտարարում էիք, թե այն պատերազմական հանցագործ Ադրբեջանին պատասխանատվության ենթարկելու գործիք է:

«Բաքվում Արևմտյան Ադրբեջանի հիմն են կատարում, մեջլիսում կազմակերպում են «Վերադարձ Արևմտյան Ադրբեջան» թեմայով լսումներ: Իսկ Արարատ Միրզոյանը երեկ խոսելով Հռոմի կանոնադրության անդամ երկների վեհաժողովում՝ բառ անգամ չի ասում Ադրբեջանի ցեղասպանական գործողությունների կամ Հայաստանի մի տարածքի օկուպացիայի մասին»,- ասաց Լ. Գալստյանը։  

Նա մեջբերեց Նիկոլ Փաշինյանի խոսքը՝ «գալու է անձնական պատասխանատվության ժամանակը»։ 

«Կառավարության անդամներին նկատի ունենալով հայտարարեց Փաշինյանը: 

Իսկ ով, եթե ոչ հենց ինքը՝ կառավարության ղեկավարն անձնապես պիտի պատասխան տա այն կործանարար սխալների համար, որոնք Արցախի կորուստ արժեցան, հազարավորների կյանք:
Մինչդեռ, այսօր այս ամբիոնից ծանր, պատմական ինքնախոստովանություն հնչեց՝ «Լեռնային Ղարաբաղի նկատմամբ վարվող քաղաքականությունը Հայաստանը պահելու և մեր պետականության գոյությունը երաշխավորելու  միակ հնարավոր տարբերակն էր» հայտարարեց Փաշինյանն: Ըստ էության, նա ոչ միայն արդարացրեց Ադրբեջանի ագրեսիան, այլև ընդունեց ցեղասպանության իր հանցակցությունը:

Իսկ աշխարհը, ցավոք,  կշարունակի մեզ ընկալել որպես ազգ-նահատակ, քանի դեռ մեր պետականության ղեկին Նիկոլ Փաշինյանն է»,- ասաց Լիլիթ Գալստյանը: