Ձեր վստահելի աղբյուրը

«Շատ կարևոր է, որ մենք ընկալենք, թե ինչպես է աշխարհն ընկալում մեզ»,- ԱԺ նիստում հայտարարեց Նիկոլ Փաշինյանը՝ ելույթ ունենալով 2025 թվականի բյուջեի նախագծի քննարկման ժամանակ։

Նա հայտարարեց, թե ամփոփելով վերջին 6.5 տրվա իր տպավորությունները՝ եկել հանգել է աշխարհում Հայաստանի միջին վիճակագրական իմիջի ընկալմանը։

«Աշխարհը մեզ ընկալում է, որպես «ազգ-նահատակ» և ընդհանուր առմամբ այն ուղերձը, որը մենք ուզում ենք հղել աշխարհին, այն է, որ մեր կառավարության մեծագույն առաքելությունն համարում ենք այն, որ մենք «ազգ-նահատակ» լինելու կարգավիճակը հաղթահարենք»,-ասաց Փաշինյանը։

Նրա խոսքով երկար ժամանակ «ազգ-նահատակ» բանաձևի հաղթահարման լավագույն բանաձևը «ազգ-բանակն է»։

«Բայց համոզված չեմ, որ սա առաջին բանաձևի ճիշտ արձագանքն է, որովհետև իմ մտորումները բերում են այն համոզման, որ «ազգ-բանակ»-ը,  «ազգ-նահատակ» բանաձեի տրամաբանության և շարունակության մեջ է»,- ասաց Փաշինյանը և հայտարարեց, թե պետք է այդ ամենին պատասխանել «պետականության» բանաձևով։

Անդրադառնալով բյուջեին՝ Փաշինյանն ասաց. «Պետական բյուջեն մեզնից յուրաքանչյուրի ընտանեկան բյուջեի անբաժանելի մաս է, ՀՀ-ում չկա նույնիսկ մեկ մարդ, որի անձնական կարքիների համար ՀՀ պետական բյուջեից միջոցներ չեն ծախսվում: Հետևաբար, ՀՀ պետական բյուջեն ՀՀ յուրաքանչյուր քաղաքացու ընտանեկան բյուջեի անբաժանելի մաս է»:

Որևէ մեկը կարող է հղի լինել 9 ամիս, մաքսիմում 9 ամիս անց պետք է մի բան տեղի ունենա

«Հարգելի գործընկերներ, որևէ մեկը կարող է հղի լինել 9 ամիս, մաքսիմում 9 ամիս անց պետք է մի բան տեղի ունենա։ Պետք է կամ ծնվի երեխան, կամ չծնվի՝ մեծ հավանականությամբ կրողի մահը պատճառելով կա՛մ սրանից բխողը, կա՛մ կեսարյան հատումով պետք է ծնվի, կա՛մ բնական ճանապարհով՝ կա՛մ կենդանածին պետք է լինի, կամ մեռելածին, կա՛մ տղա պետք է լինի, կա՛մ ազջիկ։ Էն բանը, որ մենք այս հղիությունը պետք է ևս 9 ամսով երկարաձգենք, այն աբսուրդ մոտեցում է»,-հայտարարեց Փաշինյանը։

Անդրադառնալով նրան, թե ինչ է նշանակում 2019 թվականի տեղի ունեցածը և իր վարած քաղաքականությանը՝ Փաշինյանն ասաց.

«Եթե մեր քաղաքականությունը գնահատում ենք ԼՂ-ի հարցը, կամ ինչպես պատկերավոր ասացի, այդ իրավիճակը՝ մեր պայմանական  հղիությունը ևս 9 ամիս ձգելու տրամաբանությամբ, ապա մեր վարած քաղաքականությունը կարելի է համարել սխալ, եթե մոռանանք, որ խնդրի ձևակերպումն ի սկզբանե արդեն սխալ էր։ Եթե հարցը ձևակերպում ենք պետությունը պահելու շանս ստանալու առումով, ապա պետք է ասեմ, որ այն քաղաքականությունը, որը մեք վարել ենք և վարում ենք, ոչ թե ճիշտ կամ սխալն է, այլ միակ հնարավոր տարբերակն է, որը մեզ այսօր պետություն ունենալու շանս է տալիս»,-ասաց Փաշինյանը և նշեց, թե ամեն ինչ կախված է թե ինչպես են շանսն օգտագործելու։

Նա հայտարարեց, որ եթե ինքը ԱԺ ամբիոնից որպես Հայաստանի վարչապետ ելույթ է ունենում, ապա հայկական պետականության դարավոր և ռազմավարական խնդիրը միջնաժամկետում լուծված է։