Ձեր վստահելի աղբյուրը

«Բացասական եմ վերաբերվում, որովհետև համարում եմ, որ ՀՀ վարչապետը նաև Հանրային հեռուստաընկերությամբ հրապարակային խնդրանքով է դիմել նրան և չեմ կարծում, որ ճիշտ է նման պարագայում նման խնդրանքն անտեսելը և մերժելը»,-ԱԺ ճեպազրույցների սրահում հայտարարեց Ալեն Սիմոնյանը՝ մեկնաբանելով Աղազարյանի կողմից մանդատը վայր դնելու Փաշինյանի խնդրանքը մերժելը։

ԱԺ խոսնակը տարակուսեց, որ ԶԼՄ-ները այդքան հետևողականորեն անդրադարձել են Հովիկ Աղազարյանի դեպքին։

«Աշխարհը՝ աշխարհով, բայց դուք ընկած էիք Աղազարյանից ժամը մեկ հարցազրույց վերցնելով, երևի մի երկիրը մյուսի վրա հարձակվելուց մեր ԶԼՄ-ների կողմից այդքան չէր լուսաբանվի, քան, պարոն Աղազարյանի 1.5-ը մեկ տրվող հարցազրույցները»,-ասաց Սիմոնյանը։

Նա վստահեցրեց, որ Աղազարյանի հետ հանդիպմանը ինքը չի սպառնացել։

«Եթե ես որևիցե մեկին սպառնում եմ, դա անում եմ տեսախցիկների առաջ։ Մեր միջև անկեղծ զրույց տեղի ունեցավ, որովհետև երբ մեկը քեզ սպառնում է, դու գիտես՝ դրան ոնց ես պատասխանում, բայց երբ դու անկեղծ զրուցում ես և բաց խոսում ես, այդ պարագայում իրավիճակը խոսակցության մասնակիցների մեջ շատ ավելի բարդ է և շատ ավելի ուրիշ տրամաբանության մեջ է»-ասաց Սիմոնյանը:

Խոսնակը վստահեցրեց, որ Աղազարյանի հետ իր կաբինետում թեյի բաժակի շուրջ չի քննարկել որևիցե պատճառ, այլ քննարկել է այն հարցը, որ կա նման պահանջ, կա նման խնդրանք և այդ խնդրանքը  պետք է բավարարվի:

«Որ ճնշած լինեինք, հրաժարական կտար: Ճնշում կարելի է համարել յուրաքանչյուր իմ այստեղով անցնելը և յուրաքանչյուր մարդու հետ խոսելը»,-հայտարարեց ԱԺ նախագահը և նշեց, որ ՔՊ վարչության նիստում կասի իր դիրքորոշումը։

Պատասխանելով Հովիկ Աղազարյանին խմբակցությունից հեռացնելու տարբերակի մասին հարցին՝ Սիմոնյանն ասաց. «Ես կարծում եմ որ եթե պարոն Աղազարյանը իրեն դնում է թիմից դուրս, իսկ դա թիմից դուրս դնել է, ես կարծում եմ՝ ինքը թիմի հետ ճանապարհ այլևս չունի շարունակելու։ Դա մեր թիմն է, եթե դու դնում ես քեզ թիմից դուրս, դա ամենավատ բանն է: Պարոն Աղազարյանը ինքն է դա արդեն արել»։