Ձեր վստահելի աղբյուրը

«Այսօր ունենք այնպիսի մտահոգություններ, որոնց մասին չէինք էլ կարող պատկերացնել։ Մտածում էինք, որ  պետության հետ փոխհարաբերություններում շատ հարցեր հստակեցրել ենք ու սպառել, սակայն ԱԱՀ-ի հետ կապված փոփոխությունը,  անկեղծ ասած, կայծակ էր բաց երկնքում»,-Panorama.am-ի հետ զրույցում ասաց Փաստաբանական ակադեմիայի գիտագործնական դեպարտամենտի ղեկավար, փաստաբան Մարինե Ֆարմանյանը։

Նա ընդգծեց՝ խնդիրը ոչ թե փաստաբանի ծախսերի ավելացումն է, այլ դրա բացասական ազդեցությունը, որը կրելու է քաղաքացին, նա զրկվելու է իրավաբանական աջակցությունից, մեծանալու է նրա հարկային բեռը։

«Հունվարի 1-ից քաոս է առաջանալու անվճար իրավաբանական աջակցության տրամադրման առումով։ Մեզ վրա պարտականություն է դրված, որ նույնիսկ անվճար ներկայացուցչություն իրականացնելու դեպքում պետք է մտածել մի արժեք ու հարկեր վճարել դրա համար։ Մի կողմից իրավական հորջորջվող պետությունը իբր խրախուսում է անվճար իրավաբանական աջակցությունը, իսկ մյուս կողմից շրջափակում է անվճար իրավաբանական աջակցությունը, խեղաթյուրում է փաստաբանության իրավապաշտպան բնույթը։ Սա ոչ միայն անձեռնահասություն է, այլև ենթադրյալ հանցագործություն»,-ասաց Ֆարմանյանը՝ ավելացնելով, որ իրավաբանության հետ կապ չունեցող պաշտոնյաներն են, այդ թվում ֆինանսների նախարարը,  կանգնած այս օրենքի հետևում, ինչի համար պատասխան են տալու քաղաքացիների առաջ։

Ֆարմանյանի խոսքով, իրենք չեն ընկրկելու, պայքարելու են։ Մասնագետը ճիշտ չի համարում փաստաբանական գործունեությունը համեմատել, նույնացնել ձեռնարկատիրական այլ գործունեության հետ։

«Փաստաբանը որպես հատուկ առաքելություն իրականացնող, իրավապաշտպան անձ օրենքով ամրագրված իր կարգավիճակին պետք է արժանանա, հարկային օրենսդրությունը պետք է վերանայել։ Ոչ մեկ չի ասում, չպետք է հարկվենք, բայց դա ողջամիտ պետք է լինի։ Մենք ոչ կազինո ենք, ոչ ռեստորան։ Մեր աշխատանքի բնույթը մեզ հնարավորություն է տալիս ընդգծելու մեր առաքելության կարևորությունը»,-ասաց նա։

Փաստաբանների առաջ ծառացած այլլ խնդիրների  ու անելիքների մասին՝ ձայնագրությամբ։