Ձեր վստահելի աղբյուրը

Պուատիեի համալսարանի հետազոտող Լյուդիվին Թուվերեզը, որը «Հայոց ցեղասպանության միջազգային ճանաչումը․ տասնամյակների անավարտ պայքարի հիշողութային, քաղաքական և աշխարհաքաղաքական ուղենիշները» խորագրով միջազգային գիտաժողովին մասնակցելու համար հոկտեմբերի վերջին ժամանել էր Հայաստան և եղել Հայոց ցեղասպանության թանգարանում, պատրաստել է փոքրիկ անդրադարձ Հայոց ցեղասպանության թանգարանում ցուցադրված ֆրանսիական ծաղրանկարների մասին: Այն հրապարակվել է ֆրանսիական հայտնի L'Équipe interdisciplinaire de recherche sur l'image satirique (ou EIRIS) երգիծական ուղղվածության կայքում:

Հայոց ցեղասպանության թանգարան-ինստիտուտից հայտնում են, որ հոդվածում ներկայացված է Հայոց ցեղասպանության թանգարանում ցուցադրված 19-րդ դարի վերջի և 20-րդ դարի սկզբի պատկերազարդ ֆրանսիական մամուլի հետաքրքիր հավաքածուն, որը վերաբերում է Օսմանյան կայսրությունում հայերի դեմ իրականացված ջարդերին։

Մասնավորապես անդրադարձ է կատարվում ֆրանսիական հայտնի La Presse Illustrée, L’Illustration, Le Rire և L’Assiette au Beurre երգիծաթերթերում 1894-1896 թթ. համիդյան ջարդերի, 1909 թ. Ադանայի կոտորածների և 1915-1923 թթ. իրականացված Հայոց ցեղասպանության վերաբերյալ հրապարակումներին։ Հեղինակը նշում է, որ այս պատկերները ցույց են տալիս երգիծական կերպարի կարևորությունը բռնությունը դատապարտելու գործում և անուղղակի ապացույց են հայերի նկատմամբ իրականացված վայրագությունների: