Ձեր վստահելի աղբյուրը

«Շարունակվում է ԱԺ նախկին պատգամավոր, Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի և նրա ընտանիքի անդամներ նկատմամբ դեռևս 5 տարի առաջ սկսված քաղաքական հետապնդումները»,- ասուլիսում այս մասին ասաց Ռ.Հայրապետյանի պաշտպան Ամրամ Մակինյանը։

Նա նշեց, որ քրեական գործը հարուցվում է ոչ թե մարդու նկատմամբ, այլ փաստի առթիվ, սակայն այստեղ իրավիճակն այլ է։

«Այս քրեական գործի շուրջ 30 հատորն ուսումնասիրությունն ինձ հիմք է տալիս միանշանակ գալ այն համոզման, ևս մեկ անգամ փաստաթղթավորված հասկանալ, որ այս քրերական գործը հարուցվել է Ռուբեն Հայրապետյանի անձի նկատմամբ, այլ ոչ թե որևէ փաստի առթիվ»,- ասաց Ա. Մակինյանը։

Փաստաբանի խոսքով, մինչև այսօր Հայաստանի ֆուտբոլի ֆեդերացիան միլիոններ է պարտք Ռուբեն Հայրապետյանին պատկանող Զեյթունի կահույքի ֆաբրիկային. «Ֆեդերացիան, չցանկանալով մարել պարտքերը, փորձում է օգտագործել պետության ռեսուրսները»։

Նա նշեց, որ իր պրակտիկայի ընթացքում ծանոթացել է հարյուրավոր քրեական գործերի, չի տեսել նման քրեական գործ, որ քննիչը բան ու գործը թողած, հիմնական ապացուցման առարկայի հետևից գնալու փոխարեն, ընդհանրապես սկսել է անձի ողջ  գործունեությունը քննարկման առարկա դարձնել քրեական գործի շրջանակներում։

«Այս քրեական գործի նյութերը ուղիղ ապացուցում են, որ Ռուբեն Հայրապետյանի նկատմամբ իրականացվել է ոչ թե քրեական, այլ քաղաքական հետապնդում և այս գործի նյութերը, եթե փաթեթավորենք և ուղարկենք Եվրոպա, ամեն ինչ դրանով կվերջանա։ Մարդիկ բան ու գործները թողած, պետական ռեսուրսները օգտագործում են, որ  քչփորեն, փորեն, բերեն այն ծիծաղելի մեղադրանքը, որ այսօր կա»,- ասաց Ա.Մակինյանը։

Օրեր առաջ հաղորդվել էր, որ Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի նկատմամբ նոր հանրային քրեական հետապնդում է հարուցվել 4 դրվագով 152 մլն դրամի խարդախության և 16 միլիոն դրամի փողերի լվացման համար: