Ձեր վստահելի աղբյուրը

Երևանի ավագանին այսօրվա նիստում որոշում ընդունեց, ըստ որի, երևանցիներն աղբահանության դիմաց 2025 թվականից ոչ թե մեկ անձի հաշվարկով են վճարելու, այլ ըստ բնակարանի մակերեսի։ Ավագանին սահմանեց 1ք/մ-ի համար 13 դրամի վճարման չափաքանակը։ Որոշման արդյունքում ստացվում է, որ, օրինակ, բազմաթիվ թոշակառուներ, առավել ևս միայնակները, նախկին 200 դրամի փոխարեն ստիպված են մի քանի անգամ շատ վճարել աղբահանության համար։

Panorama.am-ն Երևանի ավագանու ՔՊ-ական անդամների ընդունած որոշումը գնահատելու համար դիմեց «Սպառողների խորհրդատվության կենտրոն» ՀԿ նախագահ Կարեն Չիլինգարյանին:

Կ. Չիլինգարյան-Այդ որոշումն անհեթեթություն է, որովհետև փոքր բնակարաններ կան, որ 5-6 հոգով են բնակվում և մեծ տարածքով բնակարաններ կան, որտեղ մեկ հոգի է ապրում։ Հիմա վերջինս ինչ անի, վաճառի՞ այդ բնակարանը, եթե նա աղբ չի գեներացնում, ինչու պետք է մի քանի անգամ թանկ վճարի։

Մի անհեթեթ որոշում է, այլ որակում չեմ կարող տալ։ Ամեն օր նման մի անհեթեթ բան են հորինում։ Տրանսպորտի թանկացումը մի կոմից, հիմա էլ այս աղբահանության վճարը։ Անհասկանալի է, թե, որտեղից հնարեցին այն, երևի ինչ-որ տեղից լսել էին։ Ոչ մի դրական բան չի կարելի ասել։

Ինչպես կարելի է ք/մ-ով հաշվել։ Ես և կինս 100 ք/մ տարածքում ենք ապրում, մի ժամանակ 4-5 հոգի էինք, ամուսնացան գնացին, մենակ ենք ապրում։ Նախկինում ավելի շատ հոգով էինք ապրում, շատ աղբ գեներացնում, հիմա երկու հոգով ենք ապրում, ինչու պետք է կրկնակի օդից հնարած գումար վճարենք։ Կրկնում եմ, բնականաբար, այն սխալ ու անհեթեթ որոշում։

Կան նաև դեպքեր, որ մի տեղ գրանցված են, մյուսում ապրում են։ Գոնե գրանցումով անեին։ Բայց մյուս կողմից էլ վարձով բնակվողների խնդիր կա։ Օրինակ, 20-30 ք/մ-ում կարող են 5-6 հոգով ապրել կամ արտասահմանից,  օրինակ՝ հնդկաստանից եկածները 10-20 հոգով մի վարձած բնակարանում են ապրում, և այդ բնակարանի սեփականատերը վճարելու է 50 ք/մ-ի համար, մինչդեռ այնտեղ 10-20 հոգի է ապրում։ Սա էլ է սխալ։ Պետք է վճարեին այնքան, ինչքան ապրում են։

Բնակարան էլ կա, փակ է և մարդիկ չեն ապրում։ Ինչու պետք է վճարեն։ Մարդիկ կան, որ երկու տուն ունեն, մեկում ապրում են, մյուսում նույնիսկ գրանցված էլ չեն, այնտեղ աղբահանություն չի արվում, բայց պետք է վճարվի՞։  

Panorama.am-Չնայած դատարանի որոշմանը՝ ավագանու ՔՊ-ական անդամներն այսօրվա նիստում կրկին որոշում ընդունեցին, ըստ որի «կարմիր կետագծերի» համար կենտրոնում նորից տարեկան 160 հազար դրամ վճար սահմանեցին։

Կ. Չիլինգարյան-Սարքել են իրենց հոր դուքանը, ինչ ուզեն կանեն։ Ոչ ոք չի կարող ոչ դատապարտի, ոչ դատի, ոչ էլ պատժի։ Անպատժելի ինչ-որ իրավիճակ է ստացվում։ Դատարանի որոշումը պետք է ժողովուրդը ձեռքում պահի և ամեն մի տուգանքի ժամանակ այդ որոշումը ցույց տա։ Այդպիսի բան աշխարհում չկա։ Դատարանի որոշումը քաղաքակիրթ աշխարհում երկրների նախագահներ են կատարում, էս ի՞նչ դարձան, որ ինչ-որ քաղաքապետարան որոշի, որ չի կատարում որոշումը։  

Panorama.am-2025 թվականի համար թանկացումներ կան նաև այլ ոլորտներում. հարկային դաշտն են ընդլայնում նոր հարկեր են ավելացնում։

Կ. Չիլինգարյան-Ստացվում է, որ բյուջե են ուզում լցնել, չգիտեն որտեղից լցնեն, ինչպես անեն։ Ինչ-որ տեղերից հնարում են, որ գումարներ հավաքագրեն, բայց դե խելամիտ պետք է արվի։ Համաձայան եմ՝ 200 դրամ չէ, թող 300 հավաքեին, ասեին, թե երկար տարիներ աղբահանության վճարը չէին բարձրացրել։ Դա կարելի էր հասկանալ, բայց ինչ-որ քառակուսի մետրով հավաքագրել անհեթեթություն է։