Ձեր վստահելի աղբյուրը

Թուրքիայի նախագահ Ռեջեփ Թայիփ Էրդողանը հայտարարել է, որ իր երկիրը մտադիր է վերջ դնել Սիրիայում ահաբեկչական անջատողական կազմակերպությունների գործունեությանը, որոնք կամ պետք է վայր դնեն զենքերը, կամ կոչնչացվեն։

«Մենք վճռական ենք ջախջախելու Սիրիայում ահաբեկչական կազմակերպություններին, հատկապես ԻՊ-ին և Քրդստանի աշխատավորական կուսակցությանը (արգելված է Թուրքիայում), որոնք սպառնում են մեր երկու երկրների գոյատևմանը։

Այս անջատողական հանցագործները կա՛մ իրենք հրաժեշտ կտան իրենց զենքին, կա՛մ էլ նրանց հետ կթաղվեն սիրիական հողում։ Մենք վերացնում ենք ահաբեկչական կազմակերպությունը, որը փորձում է արյան պատ կառուցել մեր և մեր քուրդ եղբայրների միջև»,-ՏԱՍՍ-ի փոխանցմամբ՝ այդ մասին խորհրդարանում իշխող «Արդարություն և զարգացում» կուսակցության խմբակցությունում ունեցած ելույթի ժամանակ ասել է Էրդողանը։

Նա նշել է, որ Սիրիայում ահաբեկչական խմբավորումները «վտանգի աղբյուր են Սիրիայի, ինչպես նաև Իրաքի և Թուրքիայի համար»։ «ՆԱՏՕ-ի միակ անդամը, որը կռվում է նրանց դեմ, դա Թուրքիան է, և այս հարցում չի հաժողվի մեզ սահմանափակվել:

Մեր միակ նպատակն է ապահովել խաղաղություն, հանգստություն և կայունություն մեր տարածաշրջանի յուրաքանչյուր կետում՝ սկսած Սիրիայից։ Մյուսների համար Սիրիայի անվտանգությունն ու խաղաղությունը կարող է երկրորդ տեղում լինել: Մենք չենք կարող մեզ թույլ տալ այդպես մտածել, քանի որ մենք նրա հետ 900 կմ սահման ունենք»,-ասել է Էրդողանը։

Անդրադառնալով Թուրքիայում սիրիացի փախստականների խնդրին, նա նշել է, որ իր երկիրը «կօգնի նրանց, ովքեր ցանկանում են վերադառնալ», բայց «ոչ մեկին ուժով չի ուղարկի»։