Ձեր վստահելի աղբյուրը

Օրեր առաջ Panorama.am-ի խմբագրություն ահազանգած ուսուցիչներն ու դպրոցների աշխատակիցները բողոքել էին, որ տարվա ընթացքում դպրոցների տնտեսած գումարները, որոնք ավանդաբար իրենց տրվել են որպես պարգևավճար, այս տարի նախարարությունից պահանջել են փոխանցել պետական բյուջե։

Ամանորի նախաշեմին սա լուրջ դժգոհություն է առաջացրել ուսուցիչների շրջանում.
«Մեղավորն ուսուցիչներն են։ Անտրտունջ, լուռ հանդուրժում են»։

«Այո, մենք պարգևի և խրախուսանքի արժանի չենք, միայն իրենք պետք է ամեն ամիս իրենք իրենց պարգևատրեն»։

«Դե, իհարկե, բյուջեն անձնական է՝ ձեր գրպաններում ծվարած։ Ուսուցիչն ո՞վ է, որ մտնի ձեր գրպանը։ Չէ՞ որ ուսուցիչները ազնիվ են, նվիրյալ։ Նրանք կարող են նույնիսկ հաց չուտել, հոգևոր սնունդը իրենց բաժինն է, թող բավարարվեն եղածով։ Իսկ ազգային ժողովում կոճակ սեղմելը կամ իրար վրա բղավելն ու շիշ շպրտելը գիտե՞ք ինչ դժվար է»։

«Ետ են վերադարձվել, որ պատգամավորներին պարգևավճարներ տան, դե իրենք մեծ գործ են անում, ամբողջ օրը գոռում են ու միմյանց վիրավորում»։

Panorama.am-ը հրապարկման հղումն էլ. փոստի միջոցով ուղարկել էր ԿԳՄՍ նախարարություն՝ խնդրելով մեկնաբանել, թե ինչո՞վ է պայմանավորված դպրոցներում տնտեսած գումարը պետբուջե վերադարձնելու պահանջը։

Նախարարությունից պատասխանեցին՝ օրենքն է այդպես պահանջում։

«Ի պատասխան Ձեր հարցման՝ հայտնում ենք, որ ՀՀ կրթության, գիտության, մշակույթի և սպորտի նախարարությունը որևէ կերպ չի խոչընդոտում դպրոցներում պարգևավճարների տրամադրմանը: 

Տեղեկացնում ենք, որ նախարարությունն ընդամենը հիշեցրել է դպրոցների տնօրենների պարգևատրման գործող օրենսդրությունը, ըստ որի ՀՀ աշխատանքային օրենսգրքի համաձայն հիմնական աշխատավարձի նկատմամբ հաշվարկվող հավելումները, հավելավճարները և պարգևատրումները համարվում են լրացուցիչ աշխատավարձ, որը  պետք է սահմանվի գործատուի իրավական ակտով։

Հետևաբար` որևէ դպրոցի տնօրենի պարգևավճարի սահմանումը պետք է իրականացվի տվյալ դպրոցի լիազոր մարմնի հրամանով՝ օրենսդրության համաձայն։ Միաժամանակ, հարկ ենք համարում ընդգծել, որ սա վերաբերում է միայն դպրոցների գործադիր մարմնին՝ տնօրենին և վարչատնտեսական համակարգողին (առկայության դեպքում), իսկ դպրոցների մնացյալ աշխատակազմի պարգևատրումը հանդիսանում է դպրոցների իրավասության շրջանակում գտնվող հարց և կարող է իրականացվել հենց իրենց կողմից, օրենսդրությամբ սահմանված կարգով, համապատասխան ֆինանսական միջոցների առկայության դեպքում։

Եվս մեկ անգամ շեշտում ենք, որ խոսքը վերաբերում է տարիներ շարունակ գործող օրենսդրությանը, որի իմացությունը և կիրառությունը առաջին հերթին դպրոցների գործադիր մարմնի՝ տնօրենի և վարչատնտեսական համակարգողի անմիջական պարտականությունն է։

Ինչ վերաբերում է շրջանառվող այլ տեղեկատվությանը, թե դպրոցներից հետ է գանձվել տնտեսված միջոցների մի մասը, պետք է նշել, որ ՀՀ կառավարության 22.09.2022թ. 1481-Ն որոշմամբ հաստատված պետական հանրակրթական ուսումնական հաստատությունների՝ պետական բյուջեի միջոցներից ֆինանսավորման կարգի համապատասխան տնտեսված միջոցները ենթակա են վերադարձման պետական բյուջե։ Միաժամանակ, ՀՀ կրթության, գիտության, մշակույթի և սպորտի նախարարությունը նույն կարգի 7-րդ կետի համաձայն ՀՀ մարզերից և Երևան քաղաքից հավաքագրել է ուսումնական հաստատությունների կապիտալ բնույթի հրատապ անելիքները և առաջիկայում պատրաստվում է կառավարության քննարկմանը ներկայացնել տնտեսված միջոցների մյուս մասը այդ հրատապ կարիքներին ուղղելու նախագիծը։

Հարկ է նշել նաև, որ հրատապ կարիքներին արձագանք է տրվում նաև նախարարության արագ արձագանքման ֆոնդի շրջանակներում՝ հիմնականում դպրոցների տանիքների, սանհանգույցների, ջեռուցման հարցերի կարգավորման համար։ 2024 թվականին այս ֆոնդի շրջանակներում արդեն իսկ աջակցություն է տրվել շուրջ 25 դպրոցի, ընդ որում սկզբնապես նախատեսված միջոցները տարվա ընթացքում ավելացվել են շուրջ 30 մլն ՀՀ դրամով»,-ասված է նախարարության պատասխանում։