Ձեր վստահելի աղբյուրը

«Հարցը գտնվում է իրավական դաշտում և վստահ եմ, որ բոլոր պատասխանները կստանա մեր հանրությունը, ինչ վերաբերվում է իմ օգնականին, մանրամասն տեղեկություններ չեմ կարող տալ, որովհետև  ոչ միայն մասնագիտական, այլև դետալային ինֆորմացիա է պետք, իսկ ես մասնագետ չեմ և չեմ ուզենա ոչ պրոֆեսիոնալ կարծիք հայտնել»,-կառավարության շենքի դիմաց լրագրողներին հայտնեց Արագածոտնի մարզպետ Սերգեյ Մովսիսյանը՝ անդրադառնալով իր օգնական Արմեն Մարկոսյանին թմրանյութ ունենալուկասկածով բերման է ենթարկվելու դեպքին:

Նա ասաց, որ քննությունից հետո հանրությունը բոլոր հարցերի պատասխանը կստանա:

«Տե՛սեք, քանի որ հարցը վերաբերում է իմ օգնականին և բոլոր իմ գնահատականները կլինեն սուբյեկտիվ, ես էլ պաշտոնատար անձ եմ, ես իմ կարծիքն եմ ասել, ես մարդկանց հետ շփվելով կարող եմ եմ կարծիք ձևավորել: Իմ խորին համոզմամբ իմ օգնական Արմեն Մարկոսյանը նմանատիպ երևույթների հետ կապ չունի։ Դա իմ սեփական կարծիքն է, բայց ոչ ես բժիշկ եմ, ոչ հոգեբան եմ: Ես մարդ եմ, որը ունեմ իմ սեփական կարծիքը, որը որ հնարավոր է նաև սխալ լինի»,-ասաց նա:

Մարզպետը չհամաձայնեց, որ թմրանյութի հետ կապված դեպքերը ՔՊ-ի շարքերում ավելի հաճախ են արձանագրվում։

Հարցին, թե արդյոք այդ միջադեպի թեմայով խոսակցություն է ունեցել Նիկոլ Փաշինյանի հետ, Սերգեյ Մովսիսյանն ասաց. «Իմ կարծիքով, ինչն անհրաժեշտ է, որ վարչապետը արձագանքի, վարչապետը արձագանքում է: Ես չէ, որ պիտի պատասխանեմ այդ հարցին»: