Ձեր վստահելի աղբյուրը

«Մենք եկել ենք՝ այդ մարդուն հարցեր ունենք տալու։ Ոչ էթիկա ունի՝ գա ու բարևի ծնողներին, ոչ տղամարդկություն, որ զանգով ասի՝ չեմ կարող իջնել։ Թյուրիմացություն են բոլորը»,- լրագրողներին ասաց անհետ կորած զինծառայողներից մեկի հարազատը, ով այլ հարազատների հետ փակել է Բաղրամյան պողոտան ու պահանջում են հանդիպում ԱԺ պաշտպանության և անվտանգության հարցերի մշտական հանձնաժողովի նախագահ, 44-օրյա պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանի հետ։

Հարազատները նշում են՝ իրենք հարցեր ունեն տալու նրան, քանի որ հայտարարել է՝ քննիչ հանձնաժողովի աշխատանքն ավարտված է։

«Երկու ամիս է պայմանավորվում ենք, որ տեսնենք, հարցեր տանք, ստանանք պատասխաններ։ Գիտենք, որ կիսատ-պռատ պատասխաններ ենք ստանալու, բայց գոնե այդպես հասկանանք, թե ինչ է կատարվել 44-օրյա պատերազմում։ Պետք է իմանանք, չէ՞։

Այսօր եկանք այստեղ, քանի որ աշխատանքային վերջին օրն է, բայց մարդը չի ուզում իջնի, տեսնի»,- ասաց ակցիայի մասնակիցներից մեկը։

Անհետ կորած զինծառայողներից մեկի հարազատն էլ շարունակեց. «Եթե մարդը խուսափում է գալ ու մեր հարցերին պատասխանել, ուրեմն վախկոտ է»։

«Մենք վկա ենք երկրի բարձրագույն իշխանության անտարբեր վերաբերմունքին դեպի իր զինվորը, կամավորականը, ովքեր իրենց կյանքը դրել են այս հայրենիքի համար։ Դա է այս շենքում գտնվող բոլորի վերաբերմունքը ։ Փաստացի տեղյակ լինելով, որ այստեղ ենք, ոչ ընդդիմությունից, ոչ իշխանությունից մեր կողքին չեն։

Ապազգային իշխանոություն է»,- նշեց անհետ կորածի հարազատը։