Ձեր վստահելի աղբյուրը

Ժամանակին հայկական ամանորյա սեղաններին Տարեհացը, ոսպը, սիսեռը, պասային կերակուրներն էին փոխարինում խոզի ազդրին, նրբաբլիթներին: Հայերը Նոր տարին կամ Կաղանդը, Տարեմուտը դիմավորում էին ավելի զուսպ սեղաններով ու ավելի մեծ նշանակություն էին տալիս Սուրբ Ծննդյան խորհրդին:

«Երբ ուսումնասիրում ենք պատրաստված կերակուրները, հասկանում ենք, որ դրանք չեն զիջել իրենց սննդարարությամբ: Ավելի ժուժկալ էին և Նոր տարվա խոհանոցային դրսևորումն ավելի ասկետիկ: Ցավոք այժմ մարդիկ շեշտը դնում են ուտելիքների առատության վրա և ներհայեցողական վերաբերմունք չեն ունենում տոնի կարևոր խորհրդին»,-Qahana.am կայքի հաղորդմամբ, ասել է Ծաղկաձոր համայնքի Մեղրաձորի Սամվել Մուրադյանի անվան մարզամշակութային կենտրոնի տնօրեն Գոհար Գոգոլյանը։

Սուրբ Ծննդյան ուտեստների մեջ մեծ կարևորություն ունեն չորացրած մրգերից և ընկուզեղենից պատրաստված կերակուրները: Տոնական սեղանին մատուցվում է ձուկ, բրնձով և չամիչով փլավ: Բրինձը խորհրդանշում է մարդկությանը, իսկ չամիչները նրանք են, ում Աստված ընտրեց՝ Իր գործը շարունակելու: Այս ուտեստների հետ միասին մատուցվում է գինի, որը խորհրդանշում է Քրիստոսի արյունը:

Ամանորին կարելի էր ճաշակել աղանձ` համեմված ձավարով ու կանեփով, քունջութով և չամիչով, պասուց դոլմա՝ սիսեռով, ոսպով, լոբով և չամիչով, բայց գլխավոր զարդը քաղցրահամ Տարեհացն էր:

Հոգևորականը նշել է հոգևոր պատրաստության կարևորության մասին: Մեր Եկեղեցին ունի պահեցողության շրջան: Չպետք է մոռանալ, որ դեկտեմբերի 30-ից մինչև հունվարի 5-ի երեկո անհրաժեշտ է պահք պահել: Այն լուծվում է, երբ ստանում ենք Սուրբ Ծննդյան ավետիսը՝ մասնակցելով Ճրագալույցի Սուրբ Պատարագին: Սրբոց Նահատակաց եկեղեցու հոգևոր հովիվ Տեր Բարդուղիմեոս քահանա Հակոբյանը նշել է, որ ժամանակին մարդիկ հետևել են այս օրինակին, հետագայում միտումնավոր մեծ շուք է տրվել Ամանորի տոնակատարությանը.

«Խորհրդային կարգերի ժամանակ սկսվեց մեծ շուքով նշվել Նոր տարին՝ ստվերելու հոգևորը: Մարդիկ սկսեցին մեծ նշանակություն տալ Ամանորի տոնակատարությանը՝ մոռանալով, որ այդ օրերը պահեցողության համար են: Եկեղեցին քրիստոնյային հորդորում է պահք պահել, ունենալ զուսպ կեցվածք»:

Պահքը, ըստ քահանայի, անհրաժեշտ է, որ պատրաստ լինենք՝ մասնակիցը դառնալու կարևոր իրադարձության. «Պահեցողությամբ մարդը կկարողանա մաքրվել, անցնել ապաշխարության շրջան և ի վերջո կարողանալ հաղորդակից լինել Հիսուս Քրիստոսի ծննդյան մեծագույն իրադարձությանը»:

Մանրամասն՝ սկզբնաղբյուր կայքում։