Ձեր վստահելի աղբյուրը

Քրեական վարույթը վերաբերում է 44-օրյա պատերազմի ժամանակ Տիրան Խաչատրյանի գործունեությանը։ Դատարանի բակում րագրողների հետ զրույցում հայտարարեց Խաչատրյանի փաստաբան Արմեն Ադիբեկյանը։

«Նախաքննական մարմինը, մեր կարծիքով, գնահատականներ է տվել Տիրան Խաչատրյանի գործունեությանը, որն իրականությանը չի համապատասխանում։ Այդ հիմքով ավել բան չեմ կարող ասել, քանի որ այն իր մեջ կարող է պարունակել ռազմական գաղտնիք»,-ասաց փաստաբանն ու մանրամասնեց, որ Խաչատրյանին մեղադրանք առաջադրվել է Քրեական օրենսգրքի 550 հոդվածի 3-րդ մասի հատկանիշներով՝ ռազմական դրության ժամանակ կատարված պաշտոնական անփութություն։

Ադիբեկյանի խոսքով, Տ. Խաչատրյանը չի ընդունում մեղադրանքը, ավելին, կալանքի միջնորդությունն ընդհանրապես չպետք է ներկայացվեր։

«Մենք գործ ունենք անզգուշությամբ կատարված ենթադրյալ հանցագործության հետ, ավելին ասեմ, միջին ծանրության հանցագործություն է։ Որևէ հիմք չկա դրա համար, հատկապես երբ ամիսներ առաջ հարուցված այս գործով Տ. Խաչատրյանը եղել է վկայի կարգավիճակով»,-ասաց նա։

Փաստաբանի խոսքով, փաստաբանական խումբը չի հասցրել ծանոթանել գործի նյութերին, այն կազմված է 5 հատորից՝ 1200 էջից։

«Մեր տրամադրության տակ է հայտնվել այսօր ժամը 16։00-ին։ Եթե նույնիսկ ամեն էջի կարդալու վրա  ծախսենք մեկ րոպե, ստացվում է, որ գոնե 1200 րոպե պետք է։ Հիմա ներկայացնելու ենք միջնորդություն, որ հետաձգվի նիստը, ծանոթանանք գործի նյութերին»,-ասաց փաստաբանը։