Ձեր վստահելի աղբյուրը

Հունաստանի դատական իշխանությունները ուրբաթ օրը հայտարարեցին թմրանյութերի ապօրինի շրջանառության մեղադրանքով Իզաթ Խանիմ Ջավադովային ժամանակավոր կալանքի տակ վերցնելու մասին, ով պարային ակումբներում որպես դիջեյ էր հանդես գալիս Միքայելա և Միքայելա Ջավա կեղծանուններով և Ադրբեջանի նախագահ Իլհամ Ալիևի ազգականն է։

Ջավադովան ձերբակալվել էր դեկտեմբերի 30-ին Աթենքի մոտ կազմակերպված երեկույթի ժամանակ, որտեղ ոստիկանները թմրանյութեր էին առգրավել։

«Գործի նյութերում կան և՛ թմրամիջոցներ օգտագործելու, և՛ թմրամիջոցների ապօրինի շրջանառության մեղադրանքներ։ 43-ամյա կնոջ մոտ հայտնաբերվել է թմրանյութով պարկեր և առանձնապես խոշոր չափի գումար, որի ծագումը չի հիմնավորվել, և որը, ըստ ոստիկանության, ստացվել է խնջույքի ժամանակ թմրանյութերի վաճառքից»,-balkaninsight-ի փոխանցմամբ, այդ մասին ուրբաթ օրը MEGA TV-ով հայտնել է ոստիկանության ներկայացուցիչ Կոնստանտինա Դիմոգլիդուն։

Հունական ERT հեռուստաընկերության փոխանցմամբ՝ դիջեյը հերքել է մեղադրանքները։

Նա ասել է, թե երեկույթը «Tekno Berlin Kinky party-ն էր՝ սիրո և երաժշտության մասին» և որ մեղադրանքները «հարձակում էին ԼԳԲՏՔ մարդկանց վրա», քանի որ նրանք ներկայացվում էին որպես թմրանյութ օգտագործողներ:

Հունական ոստիկանությունը երեկույթին ներկա գտնվող տասը մարդու է ձերբակալել թմրանյութ պահելու, ապօրինի շրջանառության և տարածման մեղադրանքով, այդ թվում՝ դիջեյին:

Ջավադովան, ով ելույթ է ունեցել Իբիցայի և ամբողջ Եվրոպայի ակումբներում, նախկինում արդեն հայտնվել էր սկանդալների կենտրոնում։

2021 թվականին Կազմակերպված հանցավորության և կոռուպցիայի հետաքննության բյուրոն (OCCRP), Թրանսփարենսի Ինթերնեշնլ կազմակերպության բրիտանական մասնաճյուղի հետ համատեղ հետաքննության ընթացքում պարզեց, որ Ջավադովան և նրա ամուսին Սուլեյման Ջավադովը գտնվում են Մեծ Բրիտանիայի հանցավորության դեմ պայքարի ազգային գործակալության (NCA) հետաքննության տակ՝ կապված կասկածելի աղբյուրներից 13,9 մլն ֆունտ ստերլինգ (կամ 19,6 մլն ԱՄՆ դոլար) ստացման փաստով։

NCA-ն հայտնել է, որ զույգն օգտագործել է 20 օֆշորային ընկերությունների ցանց՝ միջոցները Մեծ Բրիտանիա ուղարկելու համար: Այս ընկերություններից վեցը, ենթադրաբար մաս են կազմել, այսպես կոչված, «ադրբեջանական լվացքատանը», որը OCCRP-ն բնութագրել է որպես ֆինանսական գործիք, որը թույլ է տվել երկրի իշխող վերնախավին յուրացնել փողերը, լվանալ այն և կաշառել արևմտյան քաղաքական գործիչներին:

Զույգը հերքել էր մեղադրանքները, սակայն The Guardian-ը հայտնել էր, որ նրանց հրամայվել է ավելի քան 4 միլիոն ֆունտ ստերլինգ փոխանցել Հանցագործության դեմ պայքարի ազգային գործակալությանը այն բանից հետո, երբ նրանք փոխհամաձայնության պայմանագրով ընդունել են, որ գումարը Անգլիա են տարել անօրինական ճանապարհով: