Ձեր վստահելի աղբյուրը

«Կադաստրային քարտեզները չեն պարունակում տեղեկատվություն Հայաստանի Հանրապետության սահմանի մասին այն իմաստով, որ շերտերի կառուցակարգը սահմանված է կառավարության համապատասխան որոշմամբ»,- «Արմենպրեսի» մամուլի սրահում ասուլիսի ժամանակ հայտնեց Կադաստրի կոմիտեի ղեկավար Սուրեն Թովմասյանը՝ պատասխանելով Բաղանիս-Ոսկեպար հատվածում սահմանազատումից հետո քարտեզագրման, տարածքների և մասնավոր գույքի սեփականության կարգավիճակում փոփոխություն կատարելու մասին հարցին:

Նա նշեց, որ կադաստրային քարտեզների սխալների մասին բազմիցս են խոսել և 2021 թվականին քարտեզների ուղղման կառավարության որոշումը բխում էր քարտեզների մեջ առկա բազմաթիվ խնդիրներից:

«Մենք ունենք, օրինակ, համայնքներ, որոնք մի քանի հարյուր մետր վերադրվում են իրենց վարչական սահմաններում: Սա հետևանք է նրա, որ, օրինակ, մեկ համայնքի քարտեզը ստեղծվել է մեկ մասնագիտական խմբի կողմից և վարվել է մեկ համակարգչի մեջ: Երկրորդ քարտեզը ստեղծվել է երկրորդ մասնագիտական խմբի կողմից և վարվել է երկրորդ համակարգչի մեջ... Սա չի վերաբերում միայն սահմանամերձ բնակավայրերին»:

Թովմասյանը հայտնեց, որ գույքահարկի իմաստով ողջ հանրապետությունը գոտևորել են։
«Այսինքն, ի՞նչ է տեղի ունեցել: Նախկին գոտիականությունը, որը առկա է եղել հանրապետությունում, իրականում իրականացված էր բավականին վաղուց և որևէ արժեք և որևէ գոտի արդեն մեր առօրյա կյանքին, մեր իրականությանը չէր համապատասխանում։ Եվ գոտիների նոր սահմանումից հետո սահմանվեց նաև բազային արժեքները, որոնք ունեին նվազեցվող գործակիցներ ըստ գոտիների և համապատասխան յուրաքանչյուր բնակավայրի, յուրաքանչյուր գույքային միավորի համար սահմանվեց իր գոտիականությունը և նվազեցվող գործակիցները»-ասաց կադաստրի ղեկավարը և հավելեց, որ արդեն տեղի է ունեցել գույքահարկի հաշվարկները։
Նրա խոսքով՝ սահմանամերձ բնակավայրերը ունեն գույքահարկի նվազեցման գործակիցներ, տեղի բնակիչները գույքահարկը վճարում են ոչ ամբողջական:

«Բնակավայր առ բնակավայր մեր էլեկտրոնային համակարգում առկա են տվյալներ, և կառավարության որոշման մեջ էլ առկա է գոտիականությունը և իր գործակիցները, որով հաշվարկում են այդ գույքահարկերը»,-հայտնեց Սուրեն Թովմասյանը: