Ձեր վստահելի աղբյուրը

Ալիևը գնալով «ծաղկում» է։ Նույնիսկ Էրդողանը իրեն այդքան բացահայտ լկտի գնահատականներ թույլ չի տվել, որքան ալիևը՝ Արցախը պատերազմով ու ահաբեկչությամբ գրավելուց ու մարդաթափ անելուց հետո։ Ոչ ոք Ալիևի մոտ այդքան ցուցադրական հայրենասիրություն ու  մեծամիտ խիզախություն չի դաստիարակել, որքան Նիկոլ Փաշինյանն ու  Ալեն Սիմոնյանը՝ իրենց հակահայ ու ադրբեջանամետ հայտարարություններով ու ամեն ինչ տալու պատրաստ գործողություններով։ Ոչ ոք։ Նույնիսկ Մեհրիբանն ու Էրդողանը։ Թերևս մի քիչ էլ Պուտինը՝ իր սիլիբիլիներով, վերջերս էլ՝ ներողությունով։

Բաքու- Գրոզնի թռչող Azerbaijan Airlines ինքնաթիռի վթարի պատճառները Ակտաուի մոտ  դեռևս պաշտոնապես հրապարակված չեն, բայց Ալիևը արդեն որերորդ անգամ հայտարարություններով է հանդես գնում, թե՝ Պուտինը ներողություն խնդրեց, իր երկիրը պատասխանատվություն է պահանջում... Թե իր երկիրը ինչպես է տեսնում պատասխանատվությունը, լավ երևում է Մոսկվայում ադրբեջանական դեսպանատան մոտ արված լուսանկարից.



Որ մարդկանց զոհվելը Ալիևի համար նշանակություն չունի, երևում է իր վերջին հայտարարությունից. «Մեղքը, որ ադրբեջանական քաղաքացիներ են զոհվել այդ աղետում, ՌԴ ներկայացուցիչներինն է»։

Ինքնաթիռի վթարի պատճառով զոհվել են նաև ՌԴ, Ղազախստանի, Ղրղզստանի քաղաքացիներ, սակայն Ալիևին նրանք չեն անհանգստացնում։ Ու այս իսանը պահանջում է «մարդկային վարք»։

Պուտինին ներողությունով խեղճացրած Ալիևը նոր թափով սկսեց «Զանգեզուրի միջանցքի» իր օպերացիան։ Թե բա՝ բանակցություններ Իրանի հետ այդ թեմայով, թե բա՝ միջանցքը պիտի բացվի, թե բա՝ ֆաշիստական արմենիա, թե բա՝ Հայաստանի ներկայիս ղեկավարությունը վերջ չտա «ֆաշիզմին», ինքը վերջ կտա դրան։ Թե ասա՝ ինչն է ֆաշիզմ։ Նիկոլի տոլմա-խաշլամա-ձուկը իրար հետ ուտե՞լը, ձվածեղ անե՞լը։ Միգուցե նկատի ունի խաղաղ ցուցարարների՝ կանանց, երեխաների... վրա լուսաձայնային նռնակ նետելու հրաման տա՞լը, քաղաքական տեռո՞րը։ Դրա՞նք են հուզում մարդասպան ու ցեղասպան Ալիևին։ Զարմանալի է։

Ի դեպ՝ վերջին ռազմական գործողությունները Արցախի Հանրապետությունում Ալիևը սկսեց, երբ այն հայտարարեց որպես «ահաբեկչական»։

  
Անահիտ Ոսկանյան