Ձեր վստահելի աղբյուրը

«Այս ձերբակալության դեպքը նույն ձեռագրով արդեն չորրորդն է։ Նույն ավտոմեքենայում գտնվող նույն անձանց արդեն չորրորդ անգամ կասկածում են ապօրինի զենք կրելու մեջ»,-Ֆեյսբուքյան ուղիղ եթերում հայտարարեց իրավապաշտպան Արսեն Բաբայանը՝  անդրադառնալով այսօր իրեն ու ընկերներին ոստիկանություն տեղափոխելու, ապա ընկերներին ձերբակալելու դեպքին։

Նա նշեց, դա ծիծաղելի էր որոշ ժամանակ, բայց այսօր դարձել է բավականին վտանգավոր մի երևույթ, քանի որ բազմաթիվ քաղաքացիներ, այդ թվում նաև Սրբազան շարժման մասնակիցներ այդ կասկածանքով բերման են ենթարկվել ոստիկանության բաժիններ։

Բաբայանի գնահատմամբ, ՆԳՆ քրեական ոստիկանությունը որոշել է ընդդեմ օրենքի գործողություններ կատարել։

«Ինչո՞ւ եմ շեշտում հատուկ ՆԳՆ, քանի որ այդ իրադարձությունները տեղի են ունեցել նոր նախարար նշանակվելուց հետո»,-ասաց փաստաբանը։

Բաբայանը խոստացավ տեղի ունեցածի մասին զավեշտալի մանրամասներ հրապարակել վաղը, այսօր կարճ կլինի։

«Դուք առիթ եք ունենալու տեսնել շատ ծիծաղելի ու զավեշտալի իրադարձություններ։ Այս ձերբակալությունն ունի նախաբան, կեսօրից սկսած ոստիկանությունը մեր կուսակցության («Հայրենիք» կուսակցություն-խմբ.) շենքի դիմաց տեղակայել էր այսպես ասած պոստեր։ 7-րդ վարչության, քրեական ոստիկանության միջոցով իրականացնում էր մեզ հետևելու գործընթաց։ Մենք դա ֆիքսել էինք, նրանց շարժը հսկում էինք, տեսնում էինք, առնվազն ես գիտեի, որ պետք է իրականացնեին այն ձերբակալությունը, որն իրականացրեցին։ Ես այն մեքենայում էի, որը տեղափոխեցին ոստիկանության բաժին, որը ոստիկանությունը ներկայացրել էր իր աղբյուրներով։ Հենց այդ պատճառով էի այդ մեքենայում, քանի որ գիտեի, որ այդ մեքենան պետք է տեղափոխեն, դրա մեջ եղած անձանց ձերբակալեն։ Ոստիկանությանն անակնկալի բերեցինք, երբ նրանք տեսան, որ ես էլ եմ գտնվում այդ մեքենայում»,-մանրամասներ ներկայացրեց Բաբայանը։

Անդրադառանալով դեպքի իրավական կողմին՝ փաստաբանը հիշեցրեց, որ Հայաստանում գործում է «Մասնավոր պահնորդական ծառայության մասին» օրենք։ Ըստ օրենքի, անձը, որն օգտվում է այդ ծառայությունից իրավունք ունի ունենալու անվտանգությունն ապահովող աշխատակիցներ։

«Դա լիցենզավորված ծառայություն է, լիցենզիան րամադրում է ՆԳՆ ոստիկանությունը։ Այդ նույն օրենքը սահմանում է, որ պահպանվող անձին կարող է ուղեկցել մեքենա, որում կարող են լինել ոչ ավելի, քան 3 անվտանգության աշխատակիցներ։ Արդեն չորրորդ դեպքն է, որ ոստիկանությունը համապատասխան լիցենզիա ունեցող ընկերության աշխատակիցներին կոշտ եղանակներով, այս վերջին իհարկե կոշտ չէր, քանի որ ես մեքենայի մեջ էի, ձերբակալում են ու տեղափոխում քրեական ոստիկանության բաժին՝ իբր ապօրինի զենք-զինամթերք  կրելու կասկածանքով»,-ասաց Բաբայանն ու ավելացրեց՝  ինչ-որ մեկի անառողջ գլխում ծնվել է միտք, որ Արթուր Վանեցյանը չպետք է օգտվի պահնորդական ծառայութուններից։

Իրավապաշտպանի խոսքով, սա ակնհայտ քաղաքական նպատակ է հետապնդում, քանի որ պահնորդական ծառայություն իրականացնող ընկերության աշխատակիցները լիցենզավորված են, զենք կրելու իրավունք ունեն, նրանց վերաբերյալ տվյալներն առկա են ոստիկանության, ԱԱԾ բազաներում, շատ լավ գիտեն, թե ում են ձերբակալում։

«Այս ամենը միտված է նրան, որ օրենքով թույլատրելի ծառայությունից օգտվելն ապօրինաբար արգելեն»,-ասաց Արթուր Վանեցյանի կուսակիցն ու նշեց, որ ձերբակալության ողջ պրոցեսը՝ ոստիկանների հետևելուց, նրանց նկարահանելուց մինչև ձերբակալումն իրենք նկարահանել են, վաղը կհրապարակվի շատ հետաքրքիր ու զավեշտալի տեսաֆիլմ, որը ցույց կտա ոստիկանության ապաշնորհությունը, մասնագիտական կարողությունների բացակայությունը, նրանց գործողություններն իրենց կողմից ամբողջությամբ կանխատեսելը։

Բաբայանը դիմեց ՀՀ գլխավոր դատախազին, արդարադատության նախարարին, ՆԳ նախարարին.

«Հարգելի տիկնյաք, օրենքով նախատեսված ծառայությունը, որից մենք օգտվում ենք, մի փորձեք ապօրինի, հանցավոր եղանակներով արգելել մեզ դրանից օգտվելը։ Չի ստացվելու։ Այն խնդրանքները, որ թող մեքենայի հետևից այլ մեքենա չգնա... չէ, պետք է գնա, քանի որ դա օրենքով նախատեսված է։ Առնվազն ՆԳ նախարարն այս դեպքերի հետ կապված պետք է տա բացատրություն։ Չորս անգամ իմ ընկերները ձերբակալվում են, վեց ժամ պահվում են ոստիկանության բաժնում, մեքենան տանում են, 3-4 օր պահում են...ՆԳ նախարարը պետք է բացատրություն տա, իսկ ոստիկանապետը թող մտածի, ինչ ապաշնորհ ծառայություն է  իրականացնում, որ կարողանում ենք կանխատեսել նրանց գործողոթյունները, բացահայտել օպերատիվ-հետախուզական գործողությունները և գլխներին բերել էն օյինը, որ բերեցինք այսօր»։

Մանրամասները՝ տեսանյութում։

Հիշեցնենք, որ այսօր աշխատանքային օրվա ավարտին փաստաբան Արսեն Բաբայանը հայտարարեց, որ իրեն ու ընկերներին քրեական ոստիկանությունը ձերբակալել է ու տեղափոխում է  ոստիկանություն։ Ավելի ուշ հայտնի դարձավ, որ նրանց ոստիկանություն են տեղափոխում ապօրինի զենք-զինամթերք պահելու կասկածանքով։

Արսեն Բաբայանն ազատ է արձակվել, իսկ նրա ընկերները ձերբակալվել են։ Բաբայանը որպես փաստաբան իրականացնում է իր ընկերների իրավունքների պաշտպանությունը: