Ճայթուցիկների անզգույշ կիրառման պատճառով Ամանորի գիշերը «Մուրացան» հիվանդանոց է տեղափոխվել երկու անչափահաս

Առողջություն 12:24 16/01/2025 Հայաստան

Տես նաև`«Խնդրում եմ, երեխաների համար մի՛ գնեք այդ մահաբեր պայթուցիկները». միկրովիրաբույժ

Անկախ համալսարանական մասնագետների հորդորների, ցավոք, ճայթուցիկների (պիրոտեխնիկական միջոցների) անզգույշ և անփույթ կիրառման պատճառով Ամանորի գիշերը «Մուրացան» համալսարանական հիվանդանոց է տեղափոխվել երկու անչափահաս: «Մուրացան» համալսարանական հիվանդանոցից հայտնում են, որ դեկտեմբերի 31-ի գիշերը հերթապահող թիմի կազմում էր բժիշկ-մանկական դիմածնոտային վիրաբույժ Նարեկ Մկրտչյանը, որի փոխանցմամբ` երկու տուժածին տրամադրվել է առաջին բժշկական օգնություն:

Տուժածներից մեկի մոտ առկա էին աչքի վնասվածքներ, առաջին բուժօգնություն ստանալուց հետո նա տեղափոխվել է մասնագիտացված ակնաբուժական կլինիկա, իսկ երկրորդի վնասվածքը դեմքի շրջանում էր` բավականին խորը պատռվածքի տեսքով:

Բժշկի խոսքով, բարեբախտաբար երկուսի առողջական վիճակը բավարար էր, կյանքին սպառնացող վտանգ չկար:

Համաձայն վիճակագրության, հիմնականում 16-25 տարեկան տարիքային խումբն է պատասխանատու վնասվածքների զգալի մասի համար՝ անփորձ և անպատասխանատու օգտագործման պատճառով:

«Պետք է նորից արձանագրենք, որ ոչ միայն տոնական օրերին, այլև միշտ ծնողները պետք է ուշադիր լինեն անչափահասների կողմից պիրոտեխնիկայի կիրառման հարցում, քանի որ երբեմն հետևանքները կարող են անդառնալի լինել:

Որպեսզի տոնական տրամադրությունը չխաթարվի ձգտենք լինել ուշադիր և պատասխանատու մեր և հարազատների առողջության համար»,- նշում են «Մուրացան» համալսարանական հիվանդանոցից:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: