Ձեր վստահելի աղբյուրը

«Այսօր և առաջիկա օրերին Բաքվում կայանալու են Արցախի 8 ռազմաքաղաքական ղեկավարության, 2023-ին գերեվարված 7 ռազմագերիների, 1 քաղաքացիական անձի  դատավարությունները, նրանք կանգնելու են Բավքի կեղծ, ցեղասպանական դատարանի առջև», - հայտարարեց Արցախի Հանրապետության Մարդու իրավունքների նախկին պաշտպան Արտակ Բեգլարյանը, ով ՄԱԿ-ի հայաստանյան գրասենյակի մոտ մասնակցում է հայ գերիների ազատ արձակման պահանջով արցախյան մի խումբ կազմակերպությունների նախաձեռնությամբ կազմակերպված  ակցիային։

Նա վստահ է, որ  նվաստացուցիչ պատկերներ են ի հայտ գալու ադրբեջանական լրատվամիջոցներով, կոնտեքստից կտրված հայտարարություններ, ցուցմունքներ են հրապարակվելու կամ լինելու են խոշտանգումների, տարբեր  բռնաճնշումների հետևանքով նմանատաիպ հայտարարություններ, որոնց չպետք է ուշադրություն դարձնել։

«Հիշենք, որ այնտեղ գտնվողներն իրավունք ունեն, ազատ են ասելու յուրաքանչյուր բառ, միտք, միայն թե իրենք ողջ վերադառնան հայրենիք։ Որևէ մեկը, նաև իշխանություն կրող անձ, իրավունք չունի թիրախավորելու, հարվածի տակ դնելու այնտեղ մեր եղբայրներին։ Իրենք այնտեղ են մեր երեսից, մեզ են ներկայացնում, և մենք այստեղ առավելագույնը պետք է անենք, որպեսզի որևէ կերպ չթիրախավորվեն մեր հայրենակիցների կողմից։

Մենք ադրբեջանական թեզերը, ադրբեջանական նվաստացուցիչ պատկերները չպետք է բերենք հայկական տիրույթ և սա առաջին հերթին վերաբերում է իշխանություներին»,-ասաց նա։