Ձեր վստահելի աղբյուրը

Ռուբեն Վարդանյանի  ադրբեջանական բանտում կրած զրկանքներին  անդրադարձել է  BBC-ին։

Ադրբեջանական բանտում ապօրինաբար պահվող հայ քաղաքական բանտարկյալ, Արցախի նախկին պետնախարար Ռուբեն Վարդանյանի՝ Բաքվում կրած զրկանքներին անդրադարձել է BBC-ի ռուսական ծառայությունը:

Հաղորդագրության համաձայն՝ Վարդանյանն անցկացրել է ծանր պայմաններում, որոնցից ամենավտանգավորը եղել է պատժախցում 24 ժամ շարունակված լույսի առկայությունը, ինչը հանգեցրել է նրա քնի պակասի և ֆիզիկական հյուծվածության։

Բացի այդ՝ Վարդանյանին ստիպել են երկար ժամանակ կանգնել, իսկ 2 օրից ավելի ժամանակահատվածում զրկել են ջրից։ Նրան արգելել են սպիտակեղենը կամ հագուստը փոխել, և ստիպված է եղել քնել կեղտոտ ներքնակի վրա։ Եվս մեկ անգամ հաստատվել է, որ Վարդանյանին չի տրամադրվել բուժզննում, իսկ արգելվել է նաև գրել և կարդալ։

Հաղորդագրությունում ընդգծվում է, որ այս տեղեկությունները հաստատվել են Ռուբեն Վարդանյանի ընտանիքի կողմից վարձված ամերիկացի փաստաբան Ջարեդ Գենսերի կողմից։

Այս փաստերը ևս մեկ անգամ հիշեցնում են միջազգային իրավունքի խախտումների և մարդու իրավունքների բացահայտ ոտնահարումների մասին, որոնք տեղի են ունենում Ադրբեջանի տարածքում։

«Մեզ զրկեցին ջրից ու զուգարանի թղթից».

Ադրբեջանցի քննիչները Վարդանյանին մեղադրանք են առաջադրել ահաբեկչության ֆինանսավորման, ապօրինի զինված կազմակերպությունների ստեղծման և Ադրբեջան ապօրինի ժամանելու մեջ։ Այդ ժամանակվանից քաղաքական գործիչը մյուս հայ բանտարկյալների հետ գտնվում է Բաքվի քննչական մեկուսարանում։

Ադրբեջանի բանտերում կա առնվազն 23 հայ բանտարկյալ, որոնցից ութը կալանավորվել են, ինչպես Վարդանյանը, 2023 թվականի սեպտեմբերին, երբ Ադրբեջանը լիակատար վերահսկողություն ձեռք բերեց Լեռնային Ղարաբաղի վրա։ Եվս 15-ը ռազմագերիներ են և քաղաքացիական անձինք։