Ձեր վստահելի աղբյուրը

««Մշակութային օրենսդրության հիմունքների մասին» օրենքում լրացումներ և փոփոխություններ կատարելու կարևորությունը պայմանավորված է օրենսդրական դաշտի նույնականացման անհրաժեշտությամբ, որը կնպաստի պետության կողմից իրականացվող մշակութային քաղաքականության արդյունավետության բարձրացմանը»,- այս մասին ԱԺ-ում նախագիծը ներկայացնելիս՝ ասաց հիմնական զեկուցող կրթության, գիտության, մշակույթի և սպորտի նախարարի տեղակալ Դանիել Դանիելյանը:

Նախագծի համաձայն, «Մշակութային օրենսդրության հիմունքների մասին» օրենքում առաջարկվող լրացումներն ու փոփոխությունները պայմանավորված են նաև ՀՀ-ում գործող պետական մշակութային կազմակերպությունների կառավարման մոդելների կատարելագործման և ֆինանսավորման նոր մոդելների ներդրման, ստեղծարար ոլորտի զարգացման, ինքնազբաղ արվեստագետների գործունեության համար բարենպաստ միջավայրի ձևավորման անհրաժեշտությամբ: Բարենպաստ միջավայրի ձևավորումը ենթադրում է հավասար մրցակցային դաշտի ապահովում, օրենսդրական դաշտի կատարելագործում, հեղինակային իրավունքների պաշտպանություն, ստեղծած մշակութային բարիքների ներկայացում Հայաստանում և ատրերկրում և այլն:

«Նախագիծը վերջնական հաստատման դեպքում Հայաստանի Հանրապետությունն իր անկախության օրվանից ի վեր, առաջին անգամ կունենա այսքան բովանդակալից, դինամիկ, հագեցած, մեր երկրի այսօրվա մշակութային կյանքը զարգացնող, հատկապես Հայաստանի վաղվա գեղագիտությունը կերտող մշակույթի օրենք»,- նշեց Դանիելյանը։

«Հայաստան» խմբակցության պատգամավոր Լիլիթ Գալստյանն ասաց, որ Դ. Դանիելյանն իր հիմնավորման մեջ մոռացել է նշել՝ 26-րդ հոդվածում կոնցեպտուալ փոփոխություն են կատարել, ըստ էության, դուրս թողնելով «ազգային» կարգավիճակը։

«Անցնող 13 տարիներին «ազգային» կարգավիճակ է շնորհվել իրենց մշակութային գործունեության բացառիկ առաքելություն և դերակատարություն ունեցող 11 կաազմակերպության։ Նախագծով նշվում է, թե այդ բառը փոխարինվում է «համապետական»–ով՝ շեշտելով պետության դերակատարությունը։ Այդ կառույցներն այսպես թե այնպես պետական են։ Խնդրում եմ բացատրեք, մեկանաբանեք, թե ինչո՞վ «ազգային» բառը կամ «ազգային» կարգավիճակը չի արտանցոլում այն եզակիությունը, կարևորությունը, պետության կողմից նրա առանձնակի արժևորումը, որ հանել եք այդ կարգավիճակը՝ թողնելով միայն պետական»,- հարցրեց Լիլիթ Գալստյանը։

Դ.Դանիելյանն ասաց, որ անցումային դրույթներով այն կազմակերպությունները, որոնք մինչ այսօր ունեն «ազգային» կարգավիճակը, կշարունակեն պահպանել այդ կարգավիճակն ու անվանումը։

«Բացառիկ, ամենալավ, ամենաարժեքավոր ամենազարգացնող կառույցները կունենան համապետական կարգավիճակ»,- ասաց փոխնախարարը։

Լիլիթ Գալստյանն արձագանքեց. «Դուք մոլորեցնում եք ոչ միայն ինձ,  նաև հանրությանը կամ լավ տեղյակ չեք այն նախագծին, որն ինքներդ եք ներկայացնում։ Հոդված 15՝ մինչև օրենքի ուժի մեջ մտնելը, ստեղծված և գործող «ազգային» կարգավիճակ ունեցող կազմակերպությունները պահպանում են իրենց կարգավիճակը։

Սա նշանակում է՝ նախ անցումային դրույթները 9 ամսվա ընթացքում պետք է ապահովվել, իսկ օրենքը ուժի մեջ է մտնում ստորագրելուց հետո 1 օրում։ Սա դիտավորյա՞լ մոլորեցում է, ի՞նչ եք ուզում ապացուցել»։

Դ. Դանիելյանն ասաց, որ ինքն իր պատասխանը տվեցի։

ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերով մշտական հանձնաժողովի նախագահ, ՔՊ-ական պատգամավոր Սիսակ Գաբրիելյանն արձագանքեց Լիլիթ Գալստյանին. «Հայաստանում բոլոր թատրոնները՝ համայնքային, պետական, մարզային, մեր ազգային թատրոններն են։
Ուզում եմ մարզային որևէ թատրոն չտարբերվի Երևանի թատրոններից»։