Ձեր վստահելի աղբյուրը

«Մեր միակ գործիքը որպես պետություն, իշխանությունները և բոլորս բոլոր հնարավոր տեղերում պետք է բարձրաձայենք այն խայտառակության մասին, որը կատարվում է  Ադրբեջանում»,- ԱԺ-ում լրագրողների հետ զրույցում ասաց «Հայաստան» խմբակցության պատգամավոր Լևոն Քոչարյանը՝ պատասխանելով Բաքվում հայ գերների վերադարձի համար ի՞նչ քայլեր պետք է անել հարցին։ 

Ըստ նրա, հարցի  լուծումը մաքսիմալ ճնշում գործադրելն է. «Այդ միջոցով կարելի է հասել դրան։ Դրան գումարած այն, որ բանակցություններ են վարում Ադրբեջանի հետ։ Բայց չգիտեմ՝ ինչքանով է շոշափվում այդ հարցը բանակցությունների ժամանակ։ Խիստ կասկածում եմ»։

Լևոն Քոչարյանը նշեց, որ շարունակում է  մնալ այն կարծիքին, որ խայտառակ  պարտություն կրած երկրի ղեկավարը չի կարող արդյունավետ բանակցել, ինչի ականտեսն են վերջին 4 տարիներին։

Հարցին՝  Ռուսաստանը կարո՞ղ էր այնպես անել, որ  Արցախի ռազմաքաղաքական ղեկավարությունը գերության մեջ չհայտնվեր, նա պատասխանեց. «Ես տարբեր վարկածներ եմ լսել վերջին օրերին տեղի ունեցածի հետ կապված։ Ես, իհարկե, չեմ մեկնաբանելու Ռուսաստանի նախագահի գործողությունները կամ արդեն հարցը այդ ձևով հնչեցնելը որքանով է ճիշտ։ Իսկ արդյո՞ք կարող էին այնպես անել այդ իրավիճակում, որ այդպես չլիներ, չգիտեմ։ Իհարկե, շատ լավ կլիներ, որ այդ ամեն ինչը չլիներ, բայց ունենք այս ցավալի իրավիճակը:

Կարծում եմ՝ եթե կարողանային, կանեին, որովհետև այս ամեն ինչը նաև հարվածում է նրանց հեղինակությանը Հայաստանում, որը, չեմ կարծում, որ իրենք կուզեին լինել։  Տրամաբանական տեսանկյունից չեմ կարծում, որ սա իրենց համար լավ իրավիճակ է:

Արցախը կորցնելը և այս ամեն ինչը լուրջ հարված էր Ռուսաստանի հեղինակությանը ոչ միայն Հայաստանում, այլ նաև աշխարհում, ընդհանրապես։ Չեմ կարծում՝ սա մի սցենար է, որ իրենք կուզենային, որ լիներ»։

Հարցին՝ հավակնո՞ւմ է Հայաստանի վարչապետի պաշտոնին, Լևոն Քոչարյանն ասաց. «Ես նման հավակնություն չունեմ, երբեք հավակնություն չեմ ունեցել քաղաքականությամբ զբաղվելու։ Բայց մեր երկրում դեպքերն այնպես զարգացան, եղան գործընթացներ, որոնցից չէի կարող դուրս մնալ։

Ինձ համար, անձնական  տեսանկյունից, շատ ավելի հաճելի ու հեշտ կլիներ ոչ մի բանի մեջ չլինել, իմ կյանքը ապրել։ Բայց  գործընթացներն այնպես զարգացան, որ ուղղակի չէի կարող այս ամենից հեռու մնալ։ Չգիտեմ, հետագայում ինչպես կզարգանան, բայց, ամենայն անկեղծությամբ, ես նման հավակնություն չունեմ»:

Հարցին՝ ինչպե՞ս է լինում, որ այս իշխանության օրոք  շարունակում են պետական կառույցները գնումներ կատարել իրենց ընտանիքին պատկանող ընկերություններից,  օրինակ, ասում են՝ ««Տոյոտան» Քոչարյանենցն է, մի բան կա, որ համագործակցում են», Լևոն Քոչարյանը պատասխանեց. «Տոյոտայում եղբայրս ունի 30 տոկոս մասնակցություն։ Ինչքան գիտեմ, ուղղակի ոչ մի այլընտրանք չեն ունեցել պարեկային մեքենաների հետ կապված, ստիպված են եղել գնալ դրան»։