Ձեր վստահելի աղբյուրը

Հայաստանի կառավարության 2024 թվակաի դեկտեմբերի 27-ի որոշմամբ Երևանի Վարդանանց փողոցի 30 հասցեում գտնվող «Ռոբերտ Սահակյանցի անվան անիմացիոն արվեստանոց» հասարակական կազմակերպությունը զրկվում է դեռևս 2014 թվականին անհատույց օգտագործմամբ տրված տարածքից։

Նկարիչ, ռեժիսոր, մուլտիպլիկատոր  Դավիթ Սահակյանցը Panorama.am-ի հետ զրույցում ասաց, որ չի հետաքրքրվել, թե որն է կառավարության այդ որոշման պատճառը, քանի որ իրեն պարզ է։ Նա համոզված է, որ այդ որոշումը կապված է իր ընդդիմադիր հայացքների հետ։

«Միանշանակ, դա է պատճառը։ Այստեղ այլ պատճառ ման գալն անիմաստ է, քանի որ բոլոր այն նպատակները, որին ծառայում էր այս տարածքը, կատարվում էին, ամեն տարի մենք հաշտվետվություն էինք հանձնում։

Ընդամենը կա մեկ պատճառ, ինձ համար պարզ է ամեն ինչ, եթե այլ բան կա, թող կառավարությունը մատնանշի այն պատճառները, որոնցից ելնելով կայացրել է այդ որոշումը։

Ոչ ցանկություն ունեմ, ոչ ժամանակ պարզելու պաշտոնական պատճառները, նույնիսկ պաշտոնական «հարգելի...» դիմելու ձևակերպումն ինձ համար անընդունելի է։ Ես երբևէ իրենցից ոչ բան եմ խնդրել, ոչ էլ կուզեմ այս պարագայում։

Եթե չեմ սխալվում, տարածքն անհատույց օգտագործման տրված էր 24 տարով, սակայն ժամկետից շուտ այս կառավարությունն այլ որոշում և այլ նպատակներ գտավ այդ տարածքը շահագործելու համար»,- ասաց Դ. Սահակյանցը։

Նա նշեց, որ ստուդիան այլ տարածքում պետք է շարունակի իր գործունեությունը. «Իրավունք չունենք դադարեցնել անիմացիոն ստուդիայի գործունեությունը։ Պետք է նոր տարածք գտնել, ինչն այսօրվա Հայաստանի պայմաններում շատ բարդ է։ Մենք 9 տարի այդտեղ գործունեություն ենք ծավելել, ապահոված էր ամեն ինչով դասընթացները կազմակերպելու համար։ Պետք է ամեն ինչ զրոյից սկսենք»։

Դ. Սահակյանցն ասաց, որ ծանուցում են ստացել, մինչև հունվարի վերջ պետք է ներկայանա ու ստորագրի փոխանցման ակտ, հենց այդ ժամանակ էլ կճշտի տարածքից դուրս գալու ժամկետը։
«Եթե լինեն մարդիկ, ովքեր կուզեն մեզ օգնել, շնորհակալ կլինենք, բայց այս պահին մեր միջոցներով կփորձենք վերականգնել այն, ինչ կորցրեցինք»,- ասաց մնա։

2024 թվականի վերջին ստուդիան ունեցել է 15 շրջանավարտ մեծահասակների խմբում։ 
«Արդեն սկսել էինք ընդունելության գործընթացը, տասից ավելի երիտասարդ  մեծահասակների կուրսերին մասնակցության ցանկություն էին հայտնել, նաև ունենք  մանկական ստուդիա, երեխաներին իրենց ձեռքով ստեղծում էին անիմացիաներ»,- ասաց Դավիթ Սահակյանցը։