Ձեր վստահելի աղբյուրը

Օրերս Հայաստանը Թուրքիային արտահանձնեց Հայաստանում գտնվող Թուրքիայի երկու քաղաքացու՝ Էրջան Յըլմազին և Իբրահիմ Քայմակին։ Ըստ ՀՀ ԱԳՆ-ի՝ նրանք Ինտերպոլի կողմից գտնվում էին հետախոսւզման մեջ։ Ըստ թուրքական աղբյուրների՝  Յըլմազը կազմակերպված հանցավոր խմբի ղեկավար է, իսկ Քայմակը՝ խմբի անդամ։

Հայաստանյան պաշտոնական աղբյուրները չբարեհաճեցին այլ մանրամասներ հայտնել, օրինակ՝ երբ են հայտնվել այսքան վտանգավոր հանցագործները Հայաստանում, ինչպես են սահման անցել, եթե հետախուզման մեջ են եղել, ինչով են զբաղվել Հայաստանում։ Թե ինչ ազգության են ու ինչ էին զրուցում ինքնաթիռում բարեկամական տեսքով իրենց տանողների հետ՝ չենք հարցնում։

Հիմա մյուս դրվագը.

Վաշինգտոն Հայաստանի Հանրապետության և Ամերիկայի Միացյալ Նահանգների միջև ռազմավարական գործընկերության մասին  փաստաթուղթ ստորագրեցին Արարատ Միրզոյանն ու ԱՄՆ պետքարտուղար Էնթոնի Բլինքենը։   

«Մենք նաև աշխատում ենք Հայաստանի հետ անվտանգության և պաշտպանության ոլորտում՝ մասնավորապես, աջակցելու ջանքերին՝ հաստատելու իր անկախությունն ու ինքնիշխանությունը սեփական տարածքում», - հայտարարել էր Էնթոնի Բլինքենը:

Սեփական տարածքումը՝ զավեշտալի կլիներ, եթե վարագույրված չլիներ ՀՀ սահմանների՝ նիկոլաալիևաբլինքենյան երևակայական գծերով։

Ի դեպ՝ Նիկոլի ձեռքից պետք է գոնե շատ բարակ գրող ֆլոմաստեր տալ, որ հետո, Ալիևին Հայրենիքի հերթական «չափաբաժինը» տալուց չասի՝ թղթի վրա է գիծը բարակ, բայց որ գուգլով նայում եք, գծի տակ մետրեր-կիլոմետրեր են, մեր հայրենիքը չեն դրանք։

Հայանպաստ իշխանություն լիներ, հաստ ֆլոմաստեր կտայինք, թե՝ էն կողմի վրա քաշի գիծը, թիկունքիդ ենք։ Իսկ Նիկոլի թիկունքը, բնականաբար, էլերով  է զբաղված։

Հա, էլ ինչ կար. Բլինքենի բերանով Վաշինգտոնն աջակցեց նաև «Երևանի ինտեգրմանը առավել լայն տարածաշրջանային տրանսպորտային ցանցերին», Նիկոլի հնարած «Խաղաղության խաչմերուկ» մասով, հետևաբար՝ Ալիևի ուզած «զմ»-ով (բաց չգրենք, որ չբացվի):

Երկիրը պաշտպանել չկարողացող ու Ալիևի դեմ խոնարհվոր իշխանությունները նաև որոշեցին, որ պետք է ԱՄՆ հետ պայքարեն իսլամիստների դեմ, ավելին՝ մտնեն «Իսլամական պետությանը պարտության մատնելու գլոբալ կոալիցիա»։ Այն իսլամիստների, որոնք Ադրբեջանի կողմից որպես վարձկան կռվում էին Հայաստանի ու Արցախի Հանրապետությունների դեմ, խեղում, գլխատում, անդամահատում մարդկանց։ Ու այդպես էլ անպատիժ մնացին։

16 ամյա տղային գլխատած ադրբեջանցիներին էլ Նիկոլը արտահանձնեց Ադրբեջանին՝ բարի կամքի դրսևորում որպես։ Իր համար հեշտ է ուրիշների որդիների կյանքի գնով բարի լինել Ադրբեջանի նկատմամբ։ Ոչ միայն հեշտ է, այլև՝ նպատակ։ Ու ոչ միայն որդիների՝ հիմա արդեն աղջիկների էլ։ Հազարավորների զոհած, տաս հազարավորների հաշմանդամ դարձրած ու նրանց կյանքի նպատակը ալիևին նվիրած նիկոլը հիմա էլ գտնում է, որ տղաները իրենց դերը չեն կատարել, բամբակի մեջ պահած էին, հիմա արդեն աղջիկներին բանակ տանելու ժամն է։

Հավասարեցնելու համար։

Այսպիսով՝ վերնագիրը որպես «մերկ կնոջ նկար՝ ուշադրություն հրավիրելու համար» չդարձնելու համար, եկեք տեքստից դուրս բերենք վերնագրում ասվածը։

Ադրբեջանը Հայաստանի դեմ պատերազմում վարձել է իսլամիստների, որոնք զբաղվել են ահաբեկչությամբ, սպանությամբ։
Հիմա Հայաստանը ԱՄՆ հետ իսլամիստական պետության դեմ պայքարի կանոնադրության փաստաթուղթ ունի ստորագրած, հետևաբար՝ նաև պարտավորություններ։
Հայաստանը Թուրքիային արտահանձնելով ինչ-ինչ նպատակներով Հայաստանում գտնվող, ասել է, թե՝ Թուրքիայից դուրս գտնվող հանցագործների, Ինտերպոլի հետ աշխատելու հմտություն ձևավորվեց։
Ասել կուզի՝ Փաշինյանն արդեն ուղղակի պարտավոր է Ալիևի նկատմամբ, որպես ահաբեկչական կազմակերպության ղեկավարի, հետախուզում հայտարարել ու պահանջել (կամ, ինչպես Թուրքիան է արել՝ «խնդրել») նրա արտհանձնումը Հայաստանին։

Քանի դեռ գնում է ԱՄՆ՝ կրոնական թեմաներով նախաճաշի։ 

 Անահիտ Ոսկանյան