Ձեր վստահելի աղբյուրը

«33 տարի առաջ և 33 տարի շարունակ մենք կանք գոյություն ունենք, մենք երբևէ չենք պարտվել, որովհետև ունեցել ենք և ունենք հզոր խիզախ բանակ»,-  լրագրողներին ասաց Արցախի Հանրապետության ԱԺ «Արդարություն» խմբակցության պատգամավոր Մետաքսե Հակոբյանը, ով Հայոց բանակի կազմավորման 33–րդ տարեդարձի կապակցությամբ այցելել է «Եռաբլուր» զինվորական պանթեոն։

Նա նշել է, որ հենց այդ բանակի շնորհիվ 33 տարի ապրել են գլուխները բարձր պահած։

«Մեր բանակը երբևէ չի պարտվել։ Մեր բանակն, ի տարբերություն երբեմն արվող հայտարարությունների՝ թիրախավորելով բանակը, չի պարտվել 2016-ին, 2020 թվականին, որևէ մարդական գործողության ժամանակ։ Պարտվել են իշխանությունները, որոնք բանակին թիկունքից խփողներն են նաև։

Վստահ եմ՝ մեր բանակը վերգտնելու է  իր երբեմն ուժը, հզորությունը, քանի որ ունենալու է իրեն արժանի ղեկավարներ, արժանի գերագույն գլխավոր հրամանատար, որը բանակը կառաջնորդի դեպի հաղթանակներ»,- ասաց Մ.Հակոբյանը։

Ինչ վերաբերում է Բաքվում Արցախի ռազմաքաղաքական ղեկավարության  կեղծ դատավարությանը, Մետաքսե Հակոբյանն ասաց. «Մենք դեռ մեկ տարի առաջ քաջ գիտակցում էինք՝ ինչ  պատրաստվում է, պլանավորում է  անել ագրեսոր մեր թշնամին, դա շոուն է, որը պետք է կազմակերպվի, որպեսզի կեղծ, հորինովի ցուցմունքներով, թիրախավորվի Հայաստանը, ինչի ականատեսը բավականին երկար ժամանակ է  լինում ենք։

Բաքուն շարունակելու է  այնքան, քանի դեռ ունի այդ հնարավորությունը, կանգ չի առնելու։ Իսկ ինքն ունի այդ հնարավորությունն այնքան, քանի դեռ Հայաստանում կան նման իշխանություններ, որոնք որևէ քայլ չեն անում, հակառակը՝ վերջին օրերին տեսնում ենք իրենց պահվածքը կրկնակի թիրախավորում է  Բաքվի բանտերում գտնվող մեր հայրենակիցներին»։