Ձեր վստահելի աղբյուրը

«Հայաստանն ու Վրաստանը փոխադարձաբար ու աներկբայորեն հարգում են միմյանց տարածքային ամբողջականությունն ու ինքնիշխանությունը»,-ասաց Նիկոլ Փաշինյանը Երևանում Հայաստանի և Վրաստանի միջև տնտեսական համագործակցության միջկառավարական հանձնաժողովի նիստից հետո Վրաստանի վարչապետ Իրակլի Կոբախիձեի հետ հայտարարությունների ժամանակ։

Նա նշեց, որ Վրաստանի գործընկներերին տեղեկացրել է՝  Հայաստանը շահագրգռված է տարածաշրջանային տնտեսական ենթակառուցվածքների ապաշրջափակմամբ և լիարժեք վերագործարկմամբ, որը պետք է տեղի ունենա բոլոր երկրների ինքնիշխանությունը, տարածքային ամբողջականությունն ու սահմանների անքակտելիությունը լիարժեք հարգելու շրջանակներում:

«Այս համատեքստում ընդգծել եմ Հայաստանի կառավարության ներակայացրած «Խաղաղության խաչմերուկ» նախագիծը կյանքի կոչելու կարևորությունը, որը շատ կոնկրետ ու շոշափելի հեռանկարներ է խոստանում Հայաստանի, Վրաստանի և մեր ընդհանուր տարածաշրջանի մյուս երկրների համար»,- ասաց Փաշինյանը:

Նա հայտնեց, որ գործընկերոջը ներկայացրել է  Հայաստան-Ադրբեջան հարաբերությունների կարգավորման գործընթացի զարագացումները՝ շեշտելով, որ երկուստեք մտահոգություններ ներկայացնող բոլոր հարցերի շուրջ Հայաստանը ներկայացրել է շատ կոնկրետ առաջարկներ և լուծումներ, սպասում է Ադրբեջանի կառուցողական աշխատանքին:

Փաշինյանն ասաց, որ Հայաստանի և Ադրբեջանի միջև պայմանավորվածություն է ձեռք բերվել սահմանազատման գործընթացի հաջորդ փուլը սկսել Հայաստան-Վրաստան Ադրբեջան միջպետական սահմանների հատման կետի անմիջական հարևանությամբ։ 

«Վրաստանի վարչապետի հետ այսօր տեղի ունեցած քննարկումների ընթացքում խոսել ենք նաև Հայաստանի և Վրաստանի միջև սահմանազատման գործընթացն ակտիվացնելու մասին և պայմանավորվել ենք այդ ուղղությամբ ջանքեր գործադրենք»,- ասաց Նիկոլ Փաշինյանը։