Ձեր վստահելի աղբյուրը

Ազգային անվտանգության ծառայությունը հայտարարություն է տարածել, որում ասվում է. 

«Ս.թ. հունվարի 30-ին համացանցում տարածվել էր տեսանյութ մի խումբ ԻԻՀ քաղաքացիների մասնակցությամբ Երևանի Հանրապետության հրապարակում:

ՀՀ ազգային անվտանգության ծառայության կողմից իրականացված համալիր օպերատիվ-հետախուզական միջոցառումների արդյունքում փաստական տվյալներ են ստացվել այն մասին, որ համացանցում տարածված և լայն արձագանք գտած տեսագրությունը հրապարակվել է «Ռազմավարական Հետազոտությունների Անկախ Կենտրոն» հասարակական կազմակերպության ղեկավար Ղ․ Բ․-ի կողմից՝ համանուն ֆեյսբուքյան օգտահաշվում, իսկ տեսագրությանը կից Ղ․ Բ․-ն տեղեկատվական և հաղորդակցական տեխնոլոգիաների օգտագործմամբ հանդես է եկել անձի կամ անձանց խմբի նկատմամբ քաղաքական և սոցիալական բնույթի այլ հանգամանքներով պայմանավորված՝ ատելություն և անհանդուրժողականություն հրահրելուն և/կամ քարոզելուն ուղղված հրապարակային խոսքով։

Ձեռնարկված համալիր օպերատիվ-հետախուզական միջոցառումների արդյունքում ստացված փաստական տվյալների հիման վրա ՀՀ քրեական օրենսգրքի 329-րդ հոդվածի 2-րդ մասի 3-րդ կետով առերևույթ հանցանքի մասին հաղորդում է ներկայացվել ՀՀ քննչական կոմիտե»։ 

Հիշեցնենք, որ հունվարի 30-ի Ռազմավարական հետազոտությունների անկախ կենտրոն ֆեյսբուքյան էջը տեսանյութ էր հրապարակել և գրել. «Ամո՛թ։ Երևանի կենտրոնական հրապարակում մի խումբ ադրբեջանցիներ ադրբեջաներեն  երգում են «Ղարաբաղ» (Ղարաբաղ): Իսկ ո՞ւր է մեր քաջարի ոստիկանները։ Թե՞ Եռաբլուրում կարող է ծեծել միայն մեր զոհված զինվորների մայրերին»։

Երեկ ԱԱԾ-ն  պարզաբանում էր, որ տեսանյութում պատկերված անձինք իրականում հանդիսանում են Իրանի Իսլամական Հանրապետության քաղաքացիներ։