Ձեր վստահելի աղբյուրը

«Տրամադրությունը մարտական է, քայլ առ քայլ հասնում ենք մեր դրած նպատակակետին»,-Panorama.am-ի  հետ զրույցում ասաց Զանգեզուրի պղնձամոլբիդենային կոմբինատի աշխատակից Վահե Մխիթարյանը՝ ներկայացնելով գործադուլի չորրորդ օրը։

Նրա խոսով, կարելի է ասել, այսօր գործադուլն ամենաբազմաարդն է։



«Սպասում ենք արձագանքի։ Եթե լեգիտիմության հարց կար, դա էլ կարծեք թե լուծվում է։ Հայտարարվել էր, իբր թե գործադուլին մասնակցում են կոմբինատի աշխատակիցների 7-8 տոկոսը։ Դա իրականությանը բնականաբար չի համապատասխանում, բաց, թափանցիկ քվեարկությունը ցույց է տալիս, որ մենք մոտ ենք 50+1 տոկոս նշաձողին»,-ասաց բողոքի ակցիայի մասնակից աշխատակիցը։

Հիշեցնենք, որ կոմբինատի բազմաթիվ աշխատակիցներ հունվարի 31-ից հայտարարել են գործադուլ՝ պահանջելով աշխատավարձերի բարձրացում ու աշխատանքային պայմանների բարելավում։

Ի պատասխան «ԶՊՄԿ» ՓԲԸ-ի և «ԶՊՄԿ» ՓԲԸ արհմիությունը փետրվարի 1-ին համատեղ հայտարարություն են տարածել, որտեղ մասնավորապես նշված է.

««ԶՊՄԿ» ՓԲԸ արհմիությունը վերոնշյալ գործողությունները գործադուլ չի համարում և չի աջակցում դրանց՝ համարելով ոչ իրավաչափ։ Աշխատակիցների անօրինական գործողությունների պատճառով Ընկերության արտադրական ցիկլը խաթարվել է, Ընկերությունը և մնացած աշխատակիցները կրում են զգալի նյութական վնաս»։

«Եվս մեկ անգամ ընդգծում ենք, որ սա աշխատավորական ընդվզումներ են՝ հանուն սոցիալական արդարության, և ամենակարևորը բաց երկխոսության մեխանիզմներ պետք է ստեղծել ու ինստիտուտցիոնալիզացնել, ամեն անգամ չենք հավաքվելու խնդիրները լուծելու համար, որոնք բավականին շատ են։ Մեր հիմնական պահանջը աշխատավարձի բարձրացումն է ու այդ մեխանիզմի ստեղծումը։ Արհմիությունը երբեք մեզ չի պաշտպանում, ավելի շատ հանդես է գալիս ԶՊՄԿ-ի անունից, ամեն անգամ փողոցային տարբերակով չենք լուծելու խնդիրները։ Մեր մոտեցումները չեն փոխվել»,-ասաց աշխատակիցը։

Գործադուլ հայտարարածները սպասում են կոմբինատի ղեկավարության արձագանքին, նրանց հետ  հանդիպմանը։

«Մենք կառուցողական են, առաջնորդվում ենք սոցիալական գործընկերության ու չվնասելու սկզբունքով։ Այն գումարները, որ պետք է աշխատեին գործադուլի ընթացքում, բավարար էին աշխատակիցների աշխատավարձի՝ առնվազն երկու տարով բարձրացնելու համար։ Մի խոսքով, մարդիկ գնում են ծայրահեղ տարբերակով, անընդհատ սպառնալիքներ են հնչեցնում, ԶՊՄԿ-ի պաշտոնական հռետորաբանությունն ավելի շատ հիշեցնում է թալիբանական ոճը, որը ոչ մի պլատֆորմ չի ստեղծում երկկխոսություն չի ստեղծում»,-ասաց նա։

Հիշեցնենք, որ կոմբինատի բաժնեմասերի  21.9%-ի բաժնետերը պետությունն է։ Պետական մասնաբաժնի կառավարումը տրվել է Պետական գույքի կառավարման կոմիտեին։

Արդյոք բողոքի ակցիայի մասնակիցները դիմե՞լ են պետությանը։

«Կարծում եմ՝ բոլորն էլ տեղյակ են, որ նման խնդիր կա, սպասում ենք արձագանքի»,-ասաց նա։

Մանրամասները՝ ձայնագրությամբ։