Ձեր վստահելի աղբյուրը

«Համայնքային համախմբման և աջակցության կենտրոն» ՀԿ  նախագահ, իրավապաշտպան Օլեգ Դուլգարյանն, անդրադառնալով ԶՄՊԿ-ի աշխատակիցների բողոքի ակցիային, գրում է․

«Սյունիքում գործադուլ իրականացնող աշխատավորները տեղական ժողովրդավարության կերտման, սեփական ձայնը լսելի դարձնելու գործընթաց են իրականացնում։

Արդեն երրորդ օրն է, որ ԶՊՄԿ աշխատողների մի մասը գործադուլ է իրականացնում։ Ինչպես տեղեկանում ենք մամուլից, նրանք պահանջում են աշխատավարձերի բարձրացում և աշխատանքային պայմանների բարելավում։

Այդ ընթացքում արված հայտարարություններից տեղեկանում ենք, որ գործադուլի պահանջները չեն ընդունվում ընկերության կողմից, գործադուլը բնորոշվում է որպես անօրինական և չի ճանաչվում նաև ընկերության արհմիության կողմից։

Գործադուլ անողներին չի արձագանքում նաև պետությունը, այդ թվում՝ մարզային մակարդակում, և ըստ էության գործադուլի մասնակիցները միայնակ են իրենց պայքարում և իրենց պահանջներում։
Ի՞նչ են անում գործադուլ իրականացնողները։ Նրանք քվեարկություն են կազմակերպել այսօր։ Քաղաքի կենտրոնում և կոմբինատի տարածքում քվեատուփեր են տեղադրվել, որտեղ աշխատակիցները կարող են անանուն քվեարկել՝ «աջակցո՞ւմ են գործադուլի պահանջին, թե՞ ոչ» հարցին։

Տեղական ժողովրդավարության ձևավորման բացառիկ երևույթի ականատեսն ենք։
Երբ ժողովրդավարության մեխանիզմները չեն գործում, չկան կամ չեն աշխատում, մարդիկ իրենք են ստեղծում տեղական ժողովրդավարության մեխանիզմներ կամ կիրառում իրենց համար հասանելի և ընկալելի գործիքները՝ մոտեցնելով ու բերելով ժողովրդավարությունը իրենց միջավայր։
Բացի այդ, այդ մարդիկ կոտրում են տաբուներ, խոսում և արտահայտում են մտքեր, որոնց մասին հնարավոր է տարիներ շարունակ չեն խոսել կամ գուցե փորձել են չխոսել՝ միգուցե ունենալով տարբեր օբյեկտիվ և սուբյեկտիվ մտավախություններ։

Հիմա շատ կարևոր է, որպեսզի պետական մարմինները և պատասխանատու մարդիկ ընդառաջ գնան աշխատողներին ու հանձն առնեն երկխոսություն և քննարկում։

Իսկ աշխատողների իրավունքների պաշտպանության ոլորտում առհասարակ առկա է խորքային ռեֆորմների կարիք»։