Ձեր վստահելի աղբյուրը

«ՀՀ աշխատանքային օրենսգրքի 114-րդ հոդվածի 1-ին մասի 3-րդ կետով արգելվում է աշխատանքից ազատել կամ լուծարել աշխատանքային պայմանագիրը գործատուի նախաձեռնությամբ, եթե մինչ այդ  հայտարարվել է գործադուլ։ Այս մասին Panorama.am-ի հետ զրույցում ասաց էկոլոգ-իրավաբան Նազելի Վարդանյանը։

Նշենք, որ արդեն 9-րդ օրն է «Զանգեզուրի պղնձամոլիբդենային կոմբինատ» ՓԲ-ի աշխատակիցները գործադուլ են անում՝ պահանջելով աշխատավարձերի բարձրացում և աշխատանքային պայմանների բարելավում։ Կոմբինատի ղեկավարությունն աշխատակիցների պահանջին հակառակ երեկ հաղորդագրություն տարածեց,որ 8 հոգի ազատված է  աշխատանքից ՝գործադուլին մասնակցելու պատճառով ։

Իրավաբանի խոսքով՝ արդեն հայտարարված գործադուլի ընթացքում նման գործողոթյունը դիտվում է  աշխատանքային իրավունքների խախտում։

«Ողջ գործադուլի ընթացքում գործատուի կողմից ազատված քաղաքացիները կարող են դիմել դատարան և պաշտանել իրենց իրավունքները, քանի որ այն օրենքի խախտմամբ է իրականացվել և կարող են վերականգնել իրենց աշխատանքային իրավունքները»,- ասաց Վարդանյանը։

Նրա դիտարկամամբ՝ առհասարակ հանքարդյունաբերական ընկերություններում աշխատողները պետք է վարձատրվեն ավելին, քանի որ ծանր ու վտանգավոր աշխատանք են կատարում։ Հակառակ դեպքում՝ այլ աշխատանքի կարող են անցնել։

«Մարդիկ իրենց պետք է սոցիալապես ապահով զգան։  Բացի դրանից, օրենսդրությունը նախատեսում է վտանգավոր ոլորտներում սանիտարական նորմերի պահպանություն, առողջության վրա  բացասական ազդեցության նվազեցում և այլ նորմերի պահպանություն։ Անվտանգության նորմերի մեծ ցանկ կա և բոլոր հանքարդյունաբերողներն ու վտանգավոր արտադրամասերի պատասխանատուները պետք է պահպանեն այն։ Հետևաբար, այդ մարդկանց իրավունք է պահանջել և՛ աշխատավարձի բարձրացում, և՛ վտանգավոր աշխատանքի դիմաց փոխհատուցում, և՛ հատուկ սանիտարական պայմանների ապահովում, որը կնվազեցնի իրենց առողջության վրա  բացասական ազդեցությունը։ Այսինքն՝ այն , ինչ հիմա անում են ԶՊՄԿ-ի աշխատակիցները»,- նշեց իրավաբանը։

Նազելի Վարդանյանի համար զարմանալի է նաև այն, որ Կառավարությունից որևէ արձագանք չկա՝ ԶՊՄԿ-ի շուրջ տեղի ունեցող գործընթացների մասով։  

«Բացի այն, որ կառավարությունը պետք է երաշխավոր լինի իր քաղաքացու սոցիալական, աշխատանքային մյուս սանիտարական պայմանների համար, կառավարությունը 20 տոկոսից ավելի բաժնեմաս ունի ԶՊՄԿ-ում, այսինքն՝ անհատապես պատասխանատվություն է կրում։ Սակայն, ինչպես տեսնում ենք, որևէ արձագանք չկա։ Ստացվում է, որ նույնիսկ պետության բաժնետեր լինելու պարագայում էլ ոլորտում որևէ բան չի փոխվում, նույնիսկ աշխատնքային իրավունքների պաշտպանության առումով»,- ընդգծեց Վարդանյանը։

Հիշեցենք, որ ՀՀ էկոնոմիկայի նախարար Գևորգ Պապոյանը լրագրողների հետ զրույցում ասել է, որ ԶՊՄԿ–ում սկսված գործադուլի լուծման հարցն իրենց տիրույթում չէ, չնայած նրան, որ կառավարությունը 22 տոկոս բաժնեմաս ունի ընկերությունում։