Ձեր վստահելի աղբյուրը

«Հունվարի ուղևորափոխադրման քանակի հիման վրա 1 ուղևորափոխադրման ինքնարժեքը ստանում ենք 313 դրամ»,- ավագանու նիստում հայտարարեց Երևանի քաղաքապետ Տիգրան Ավինյանը։
Նա նշեց, որ թվերը կարող են ոչ միայն նվազել, նաև աճել, ինքնարժեքը միջինացված, արդեն նոյեմբերից հաշված սկսում են ավելի իրական թվերի բերել։

«Այո, նոյեմբերին 203 դրամ էր, հունվարին՝ 313 դրամ է ստացվում»,- ասաց Ավինյանը։

«Մայր Հայաստան» խմբակցության ղեկավար Մանուկ Սուքիասյանն ասաց, որ Երևանում բնակչության թիվը մեծացել է, ցույց տված թվերով տրանսպորտից  օգտվողների թիվը նվազել է. «Կանխատեսել էիք 550 հազար, բայց ստանում ենք 231 հազար, մետրոյով ու տրոլեյբուսով՝ 308 հազար ուղևորափոխադրում։

Այս թվաբանական շիլա-շփոթը... արժանահավա՞տ է երևանցու համար, ինչպե՞ս կարելի է նման էքսպերիմենտներով գնալ տրանսպորտային բարեփոխման»,- ասաց «Մայր Հայաստան» խմբակցության ղեկավար Մանուկ Սուքիասյանը։

Տ.Ավինյանն ասաց. «Շիլա-շփոթ չկա, երբևէ չի եղել։ Սեզոնից սեզոն թվերը կարող են փոխվել։ Հունվարին ուղևորափոխադրումը նվազում է»։

Հունվարին Երևանում ավտոբուսով, մետրոյով ու տրոլեյբուսով ուղևորափոխադրումների ընդհանուր քանակը կազմել է 9 մլն 562 հազար, օրական միջինը կազմել է 308 500 ուղևորափոխադրում։ Հունվարին միայն «Երևան ավտոբուսի» ուղևորափոխադրումների քանակը կազմել է 6 միլիոն 936 հազար, օրական ստացվում է՝ 231 հազար ուղևոր է փոխադրում։