Ձեր վստահելի աղբյուրը

Ակտիվիստ, Երևանի խնդիրների, քաղաքապետարանի անգործության, անարդյունավետ ու կասկածելի ծախսերի մասին հաճախ բարձրաձայնող գործիչ Արթուր Չախոյանի դեմ մահափորձի գործով դատական այսօրվա նիստն ընթանում է դռնփակ։

Ինչպես հայտնում է դատարանի դահլիճում աշխատող Panorama.am-ի լրագրողը, մեղադրյալը՝ Էդգար Կուչուկյանը դեմ է արտահայտվել նիստի տեսանկարահանմանն ու հեռարձակմանը։

Հիշեցնենք, որ գործը քննվում է Երևան քաղաքի առաջին ատյանի ընդհանուր իրավասության քրեական դատարանի Ավան նստավայրում։ Նախագող դատավորը Արման Հովհաննիսյանն է։ Դատարանը դատախազությունից գործը ստացել է անցած տարվա հունվարի 17-ին։

Դատալեքսում հրապարակված տվյալների համաձայն, Էդգար Կուչուկյանը նախկինում դատապարտված է։ Նրա նկատմամաբ խափանման միջոց է ընտրված բացակայելու արգելքը։

«Իմ վրա այդ հարձակումը քաղաքական էր, քանի որ իմ հանրային գործունեությունը շատ ուժեղ ազդել էր ՔՊ-ի վարկանիշի և իրենց տրվելիք քվեի վրա։ Դրա համար փորձել են ինձ հետ հաշվեհարդար տեսնել։ Կարող եմ հայտարարել, որ շատ փաստեր կան, որ իմ վրա հարձակումը տեղի է ունեցել ՔՊ-ի պատվերով։ Ավելին, իմ ներքին համոզմամբ, այն իրականացրել է Տիգրան Ավինյանը, նրա պատվերն է եղել»,-Panorama.am-ին տված հարցազրույցում հայտարարել էր Չախոյանը։

Մեղադրական եզրակացության համառոտ բովանդակության մեջ նշվում է՝ Էդգար Արմենի Կուչուկյանին մեղադրանք է առաջադրվել այն բանի համար, որ նա 2023թվականի հոկտեմբերի 09-ին՝ ժամը 19:20-ի սահմաններում, Երևան քաղաքի Գայի պողոտա 43-րդ շենքի 3-րդ շքամուտքի մոտ, քննությամբ չպարզված երկու այլ անձանց հետ, մոտեցել է Արթուր Աշոտի Չախոյանին և հարցրել ՙՙչճանաչեցիր ինձ՚՚, ինչին ի պատասխան՝ վերջինս հայտնել է ՙՙոչ՚՚, որից հետո տրված պատասխանը որպես առիթ օգտագործելով, ինքնությունները չպարզված անձանց հետ, խմբի կազմում, գիտակցելով և փոխլրացնելով միմյանց գործողությունները, խուլիգանական դրդումներով, այն է՝ չնչին առիթով, սեփական անձի առավելությունն ընդգծելու մոլուցքով տարված, հարձակվել են Արթուր Չախոյանի վրա, ոտքերով և ձեռքերով հարվածներ հասցրել նրա մարմնի տարբեր մասերին՝ վերջինիս առողջությանը պատճառելով թեթև վնասի հատկանիշներ չպարունակող՝ ստորին շրթունքի արյունազեղման, որովայնի, զույգ ծնկան հոդերի շրջանների քերծվածքների:Որից հետո, Էդգար Կուչուկյանը և չպարզված երկու անձիք դիմել են փախուստի, ինչի ընթացքում Էդգար Կուչուկյանին մոտենալուց հետո, վերջինս ոտքի է կանգնել և գրպանից հանելով դանակը՝ հարվածներ է հասցրել Ա. Չախոյանի որովայնի ձախ հատվածին և զույգ դաստակների շրջաններին՝ վերջինիս առողջությանը պատճառելով թեթև վնասի հատկանիշներ չպարունակող՝ կրծքավանդակի ձախ կեսի քերծվածքի և զույգ դաստակների շրջաններին կտրված վերքերի ձևով մարմնական վնասվածքներ: