Ձեր վստահելի աղբյուրը

«Գյումրու և Հայաստանի գլխավոր պրոբլեմը երևույթ է, որի անունը նիկոլիզմ է, և անձ է, որն ապրում է Երևանի կառավարական ամառանոցներից մեկում»,-ֆեյսբուքյան ուղիղ եթերում հայտարարեց հասարակական գործիչ, պրոդյուսեր Ռուբեն Մխիթարյանը։

Նա նշեց, որ դրա գիտակցումն է իրեն ստիպել ընդունել իր կյանքի հերթական շրջադարձային որոշումը։

«Ես որոշել եմ առաջադրվել, որպես Գյումրու քաղաքապետի թեկնածու և «Իմ հզոր համայնք» շատ մարդակենտրոն կուսակցության միջոցով շուտով ներկայացնելու եմ  նոր քաղաքական և հայտնի համայնքային դեմքերի»,-ասաց Մխիթարյանը։

Նշելով, որ Գյումրու քաղաքապետի աթոռն իր համար ինքնանպատակ, կամ կյանքի իմաստ չէ՝ Մխիթարյանն ասաց, որ ընդամնեը ցանկանում է իր համաքաղաքացիներին՝ գյումրեցիներին տալ իրական այլընտրանքի հնարավորություն և միակ նպատակը օրվա իշխանություններին հաղթելն է։

«Ես Գյումրու քաղաքապետի մյուս թեկնածուներին ինձ հակառակորդ կամ առավել ևս թշնամի չեմ համարում, որովհետև բոլորս էլ քաղաքի մարդիկ ենք ու իրար ճանաչում ենք, բայց դիրքորոշումս շատ հստակ է՝ Գյումրի քաղաքի ընտրություններում օրվա իշխանությունները հաջողություն չպետք է գրանցեն և այդ արդյունքին հասնելու համար ես պատրաստ եմ համագործակցել նման հստակ դիրքորոշում ունեցող Գյումրիի քաղաքապետի մնացած բոլոր թեկնածուների հետ։

Ինձ համար ընտրությունների դրական արդյունք ես համարելու եմ օրվա իշխանությունների տապալումը, թե որ դեմքի կամ որ դեմքերի միջոցով է դա տեղի ունենալու, ինձ համար ընդհանրապես էական չէ, բայց ես մեծ հույս ունեմ սիրելի գյումրեցիներ, որ դուք հատկապես հավանելու եք մեր կողմից ներկայացված Գյումրու զարգացման ծրագիրը։ Ձեզ սպասվում է երկրի լավագույն քարոզարշավը, որը լինելու է իրատեսական, պայծառ, դրական ու ամենակարևորը՝ գյումրվա։

Ես ունեմ Ձեր բոլորի օգնության կարիքը՝ և երիտասարդների, և միջին սերնդի, և մեր ծնողների։ Եկեք մեր քաղաքին հնարավորություն տանք իսկապես իրական, բարեկեցիկ ու արժանապատիվ ապագա ունենալու համար, որ մեր ծնողները կարոտով չհիշեն հիանալի Լենինականը, իսկ մեր ջահելները, երիտասարդները ուրախանան ու հպարտանան իրենց զարգացող, շողացող, պայծառ ու ամենակարևորը՝ ժամանակակից Գյումրիով»,-ասաց Մխիթարյանը։