Ձեր վստահելի աղբյուրը

Երեկվանից համացանցում տեսանյութ է տարածվում, թե ինչպես 48 համարի ավտոբուսի վարորդը թույլ չի տալիս հաշմանդամություն ունեցող տարեց մարդուն  նստել ավտոբուս։

«Չեմ թողելու դու նստես, կվճարես, կնստես, չէ՝ չես նստի»,- ասաց վարորդը։

Տարեց մարդն իջնում է ավտոբուսից։

Իսկ ահա այսօր Երևանի քաղաքապետ Տիգրան Ավինյանը քաղաքապետարանի գործակարգավարական խորհրդակցության ժամանակ ասաց, որ իր աջակցությունն է հայտնում վարորդներին։

«Թվերից ակնհայտ է, որ քաղաքացիների որոշ քանակ շարունակում է չվճարել ուղևորափոխադրման համար։ Քանակը մեծ չէ, այնքան չէ, որքան խոսում էր ընդդիմությունը»,- ասաց նա։

Ավինյանի ներկայացմամբ, ավտոբուսների ներսում տեղի են ունենում տարատեսակ միջադեպեր, երբ որ ավտոբուսի վարորդները հրաժարվում են վարել, որովհետև իրենց աշխատանքային պայմանագրով նախատեսված է, որ իրենք պետք է հետևեն, որպեսզի վճարումները կատարվեն։

«Ավտոբուսի վարորդներին ուզում եմ իմ աջացությունը հայտնել, չնայած տեսնում եմ՝ լինում են միջադեպեր, երբ վարորդների կողմից լինում է  մի փոքր կոշտ արձագանք։ Դա էլ նույնպես հասկանալի է՝ ծանր աշխատանք է, անընդհատ այդ տեսակ լարման մեջ լինելով՝ որոշ դեպքերում նյարդերը կարող են տեղի տալ։

Մի տեսահոլովակ աչքովս ընկավ, երբ որ ակնհայտորեն հաշմանդամություն ունեցող անձը... Ով միգուցե տեղեկացված չէ, որ իր ուղևորափոխադրումն անվճար կարող է լինել։ Քանի որ տեղեկացված չէ, չի ստացել նաև տրանսպորտային համապատասխան իր քարտը, որը կապահովի իր անվճար երթևեկությունը։ Այս տեղեկատվությունը պետք է տարածենք՝ առաջին, երկրորդ կարգի հաշմանադմություն ունեցող անձնաց համար անվճար է»,- ասաց Տ.Ավինյանը։

Նա նշեց, ինչ վերաբերում է  այն անձանց, որոնք այս կամ այն պատրվակով ինչ-որ մի արդարացում գտնում են, որպեսզի չվճարեն տրանսպորտի համար, այդ մարդիկ պետք է գիտակցեն,  որ այս չվճարումներով իրենք նաև որոշակի խնդիրներ են ստեղծում «Երևան ավտոբուս»  ՓԲԸ-ում, քաղաքապետարանի տրանսպորտի ոլորտում եկամուտների հավաքագրման առումով։

«Դա որևէ արդարացում չունի։ Բոլորը գիտակցեն, բոլոր այն մարդիկ, ովքեր այսօր մտնում են ավտոբուս ու չեն վճարում, իրենք աջակցում են այն օրակարգը, որ Երևանում այս տարի 45 տրոլեյբուս չգնվեն, այսինքն նրանք չեն ուզում շարունակական փոփոխություն, շարունակական զարգացում, ուզում են եղած ավտոբուսների տեխնիկական վիճակը վատթարանա։

Այդ արդարացումների  ժամանակն էլ անցավ, որ՝ բոյկոտում ենք, առաջարկում եմ՝ արդեն անցնել կոնկրետ համապատախան միջոցների կիրառմանը, որպեսզի այդ արդարացումներով առաջնորդվող մարդիկ էլ էլ այդ արդարցումներով  չկարողանան առաջնորդվել»,- ասաց Տիգրան Ավինյանը։