Ձեր վստահելի աղբյուրը

«Ողջ բանակցային գործընթացը՝ մինչև 99 թվականը հետևյալ բովանդակությունն ուներ։ Համանախագահողները չէին կարողանում դուրս գալ տարածքային ամբողջականության սկզբունքից դուրս։ Չէին դուրս գալիս»,-ասաց ՀՀ երկորրդ նախագահ Ռոբերտ Քոչարյանը՝ պատասխանելով «Ազատություն» ռկ-ի՝ Մեղրին Արցախի դիմաց Ադրբեջանին հանձնելու սցենարի ու բանակցությունների մասին հարցին։

Քոչարյանն ասաց,  այդ ընթացքում համանախագահները ինչ առաջարկ բերում էին, «փորձում էին տարածքային ամբողջականությունն ամուսանցել ինքնորոշման սկզբունքի հետ»։

«Հիմա հանկարծ Վաշինգտոնում Ալիևն ինձ ասում է, եկեք իրարից պոկվենք, անջատվենք։ Այդ առաջարկում ես տեսել եմ այդ մասը, որը հնարավորություն էր տալիս կոտրել կարծրատիպը համանախագահողների մոտ։ Մտածում էի, հենց Ալիևը այդ հարցը բարձրացնի համանաագողների առջև, մենք այս կաղապարված վիճակից դուրս ենք գալու։ Այո, մենք բանակցել ենք։ Ինքն առաջարկում էր դա, ես ասում էի՝ չենք կարող կորցնել Իրանի հետ սահմանը։ Պրոցեսն ինքը շահավետ էր մեզ համար, ինչ-որ ասում էր Վարդան Օսկանյանը, հենց սա էր ասում»,-ասաց նա։

Ռոբերտ Քոչարյանն ընդգծեց, որ ԱՄՆ-ից ոևէ առաջարկ չի եղել, առաջարկ ԵԱՀԿ Մինսկի խմբի անունից անելիս գալիս էին եռանախագահողները։

«Ի՞նչ է կատարվել մինչ այդ։ Ալիևն ամերիկյան կողմին պատմել է մեր բանակցային գործընթացի մասին։ Այդ պատվիրակությունը եկել է Հայաստան՝ հասկանալու, իսկապես դա այդպե՞ս է, թե՞ չէ, և Ալիևի ընկալումներն այդ բանակցություններից և մեր ընկալումները նու՞յնն են, թե՞ ոչ։ Չի եղել առաջարկ, որ մենք ասենք, ընդունում ենք կամ չենք ընդունում, կամ ընդունում ենք վերապահումներով։ Չի եղել։ Երկու տարի տևած գործընթացի արդյունքում համանախագահների կողմից հնչած միակ առաջարկը եղել է Քի Վեսթում։ Ուրիշ գրավոր առաջարկ երեք համանախագահների կողմից չի եղել։ Եթե ևս մեկ անգամ կարդաք իմ գրքի այդ հատվածը, կտեսնեք, որ չի եղել։ Բայց ինձ համար շատ կարևոր էր, որ Ալիևն ինքն իր այդ մոտեցման մասին պատմի համանախագահողներին, որ թեման ինքը բացի, ես չէի հավատում, որ ինքը դա քննարկում է, ես մտածում էի՝ հետ է քաշվելու։ Եթե Ձեր իսկ հրապարակած նյութը կարդաք, կտեսնեք, որ ես ոչ այո էի ասում, ոչ ոչ էի ասում, շատ զգուշավոր էի։ Այնպես էի անում, որ թեման շարունակվի առանց պարտավորությունների»,-ասաց ՀՀ երկրորդ նախագահը։

Ռոբերտ Քոչարյանն ընդգծել է, որ Հայաստանի այն ժամանակվա վարչապետ Վազգեն Սարգսյանը տեղյակ է եղել ամեն ինչից։

«Վազգեն Սարգսյանը Հայաստանի Հանրապետության վարչապետն էր, որն ուներ մեծամասնություն խորհրդարանում, որևէ լուծում հնարավոր էչր այն ժամանակ իրականացնել առանց Վազգեն Սարգսյանի»,-ընդգծեց ՀՀ երկրորդ նախագահը։

Մանրամասները՝ տեսանյութում։