Ձեր վստահելի աղբյուրը

«Բոլորս գիտենք, մեծ հաշվով գյումրեցիների ձայնը խլված է։ Գյումրեցիներն ընտրել էին իրենց քաղաքապետին։ Տեսանք՝ ինչ եղավ։ «Բալասանյան» դաշինքը դադարեցրեց գործունեությունը, հրաժարական տվեց»,-խոսելով Գյումրիում կայանալիք արտահերթ ընտրություններին մասնակցելու որոշման պաճառների մասին՝ հայտարարել է ԱԺ «Պատիվ ունեմ» խմբակցության անդամ Մարտուն Գրիգորյանը։

Նա ընդգծել է՝ չպետք է թույլ տալ ու հանդուրժել նման բաներ։

«Կառավարությունը չի ցանկանում աշխատել տվյալ համայնքի ղեկավարի հետ, և որոշում են, որ ճնշումների արդյունքում պիտի զրկեն տվյալ մարդկանց կառավարումից»,-իրավիճակը ներկայացրել է նա։

Որոշման այլ պատճառների մասին խոսելիս Մ. Գրիգորյանը հիշեցրել է, որ արդեն 18 տարի քաղաքականության մեջ է, որից 14-ը եղել է օրենսդիր մարմնում։ Այդ ընթացքում մշտապես բարձրաձայնել է Շիրակի, Գյումրիի խնդիրների մասին։

«Տեղյակ եմ Գյումրու բոլոր խնդիրներին։ Այդ տարիների ընթացքում փորձել եմ, հնարավոր ամեն բան արել եմ՝ մեր քաղաքի խնդիրներին լուծում տալու»,-նշել է Գրիգորյանը։

Իսկ քաղաքում խնդիրները շատ-շատ են՝ սկսած երկրաշարժի հետևանքով առաջացա/ ու դեռ լուծում չստացած սոցիալական խնդիրներից, մինչև վթարային շենքեր, պատշգամբներ, կամարներ։

«Երբ ասում են աղքատությունը մարդկանց գլխներում է, այդպես չէ։ Կա ռեալ խնդիր ու դրա հաղթահարումը չպետք է թողնել միայն մարդկանց վրա, պետք են տարբեր զարգացման ծրագրեր։ Մարդիկ միշտ լսել են նախընտրական խոստումներ, բայց մնացել են ձեռնունայն,չեն ուզում հավատալ։ 2016-ից Գյումրին կարծեք գտել է իր զարգացման ուղին՝ տուրիզմ, ցույց տրվեց Գյումրու պոտենցիալը։ Ցավոք, այսօր ոլորտը գնում է դեպի անկում, մինչդեռ դա պարգև էր։ Իմ թիվ մեկ խնդիրը լինելու է տուրիզմի զարգացումը։ Սուտ են թեզերը, թե տուրիզմով չենք կարողանալու քաղաք պահել, զարգացնել։ Գյումրին վերջին տարիներին սկսել է շնչել, աշխուժանալ։ Իմ թիմը տուրզիմի հետ կապված ունի շատ լուրջ ծրագիր, որով կկարողանանք Գյումրիին վերադարձնել փառքը, մեծացնել տուրիստների հոսքը։ Գյումրին ունի այդ պոտենցիալը։ Հիմա այդ բեռը մնացել է մասնավորի հույսին, քաղաքապետն ու քաղաքապետարանն այս առումով մեծ անելիք ունեն»,-ասել է նա։

Հիշեցնենք, որ Գյումրիում ավագանու արտահերթ ընտրությունները նշանակված են մարտի 30-ին։
Կուսակցությունների, կուսակցությունների դաշինքների ընտրական ցուցակների առաջադրման և գրանցման համար անհրաժեշտ փաստաթղթերը թիվ 31 ընտրատարածքային ընտրական հանձնաժողով կարող են ներկայացնել մինչև մարտի 5-ը, ժամը 18:00-ն: Գրանցումն իրականացվելու է մարտի 5-ից մինչև մարտի 10-ը՝ ժամը 18:00-ն:

Նախընտրական քարոզչության ժամանակահատվածն է մարտի 15-ից  մինչև մարտի 28-ը՝ ժամը 24:00-ն։

Գյումրիում ընտրություններին մասնակցելու մասին արդեն հայտարարել են հայտնի պրոդյուսեր Ռուբեն Մխիթարյանը, ԱԺ պատգամավոր Մարտուն Գրիգորյանը, Գյումրու նախկին քաղաաքապետ Վարդան Ղուկասյանը, Գյումրու քաղաքապետի ՔՊ-ական ԺՊ Սարիկ Մինասյանը, «Այընտրանքային դեմոկրատական» կուսակցությունը։