Մանկապարտեզները կառուցելու համար Նիկոլ Փաշինյանը Աշոտիկի բերնի՞ց է կտրում. Ռուբեն Մխիթարյան
«Մանկապարտեզները կառուցելու համար Նիկոլ Փաշինյանը գումարներն իր տնի՞ց է բերում, Աշոտիկի բերնի՞ց է կտրում։ Եկեք՝ ճիշտ հասկանանք»,-News.am-ին տված հարցազրույցում ասել է Գյումրու ավագանու արտահերթ ընտրություններին մասնակցելու որոշման մասին հայտարարած պրոդյուսեր Ռուբեն Մխիթարյանը։
Նա հիշեցրել է, որ դրանք կառուցվում են քաղաքացիների վճարած հարկերով։
«Ոչ միայն հարկերով, այլև իրենց վերցրած աննորմալ վարկերով։ Արտաքին պարտքը հասել է պարզ չէ, որտեղ։ Այդ գումարներով կառուցվում է, հետո ինքը (Փաշինյանը-խմբ.) գնում, մատով քանդում է։ Ինչպես իրենց գաղափարային գիծն է կախիչից կախված, որը մատով կարող ես պոկել»,-ասել է Մխիթարյանը։
Նա հիշեցրել է, որ 2018-2024 թվականներին Գյումրու համայնքապետարանն ամենաշատ հավաքագրումներն է ապահովել, հետևաբար ամենաշատ սուբվենցիոն ծրագրերն է ստացել։
«Մինչև անցած տարի, երբ տեղի ունեցավ քաղաքապետի աթոռազրկումը, Գյումրին երբեք ՔՊ-ական քաղաքապետ չի ունեցել»,-ասել է նա։
Անդրադառնալով Բալասանյան դաշինքի հետ կատարվածին՝ Մխիթարյանն ընդգծել է, որ 9800 մարդու քվե բանի տեղ չի դրվել էս ժողովրդավարության բաստիոնում։
«Եթե այդ 20 հոգին թաթախված էին կոռուպցիոն գործարքների մեջ, ինչի՞ մինչև հիմա կալանավորված չեն։ Եթե ասոցացվում էին այլ մարդկանց հետ, ինչի՞ բաց չի հրապարակվում։ Կա փաստ, որ իշխանությունը, որին ժողովուրդն ընտրել է 9800 ձայն տալով, մի գիշերում հրաժարական է տվել ու գնացել քաղաքապետարանից, ու դա չի հուզում քաղաքական ուժերին, հասարակական կազմակերպություններին, մեր երկրում հավատարմագրված դեսպաններին, ոչ մեկին։ Ոչ մեկ չի գնում էդ մարդկանց դուռը ծեծում, կարո՞ղ է՝ էդ մարդիկ անհետացել են, դատախազությանը չի՞ հետաքրքրում, թե ինչի 20 հոգի քար լռություն է պահպանում։ Ես պնդում եմ, որ տեղի է ունեցել շատ վատ բան։ Ժողովրդավարություն գովերգող, դրա համար դոշ ծեծող մարդիկ ու էդ կուսակցության ներկայացուցիչներն անմեղ գառի դեմքով ասում են՝ մարդիկ որոշեցին,որ էլ քաղքականությամբ չեն զբաղվում։ Է, հո՞րդ արև, ո՞նց թե քաղաքականությամբ չեն զբաղվում, երեկ զբաղվում էին, էսօր 20 հոգով որոշեցին, որ չե՞ն զբաղվում։ Ներբակային ֆուտբոլային հանդիպում էր, ի՞նչ էր, գնդակը վերցրեցին, նեղացան, «մամաս տուն է կանչում», գնացին։ Տեղի է ունեցել շատ վատ բան, որի հետևից չի գնում ոչ ոք։ Օրը գալու է, ես գնալու եմ այդ ամեն ինչի հետևից, ես դա բացահայտելու եմ ու փաստերով եմ ներկայացնելու»,-ասել է Մխիթարյանը։
Հիշեցնենք, որ Գյումրիում ավագանու արտահերթ ընտրությունները նշանակված են մարտի 30-ին։
Կուսակցությունների, կուսակցությունների դաշինքների ընտրական ցուցակների առաջադրման և գրանցման համար անհրաժեշտ փաստաթղթերը թիվ 31 ընտրատարածքային ընտրական հանձնաժողով կարող են ներկայացնել մինչև մարտի 5-ը, ժամը 18:00-ն: Գրանցումն իրականացվելու է մարտի 5-ից մինչև մարտի 10-ը՝ ժամը 18:00-ն:
Նախընտրական քարոզչության ժամանակահատվածն է մարտի 15-ից մինչև մարտի 28-ը՝ ժամը 24:00-ն։
Գյումրիում ընտրություններին մասնակցելու մասին արդեն հայտարարել են հայտնի պրոդյուսեր Ռուբեն Մխիթարյանը, ԱԺ պատգամավոր Մարտուն Գրիգորյանը, Գյումրու նախկին քաղաաքապետ Վարդան Ղուկասյանը, Գյումրու քաղաքապետի ՔՊ-ական ԺՊ Սարիկ Մինասյանը, «Այընտրանքային դեմոկրատական» կուսակցությունը։
Լրահոս
Տեսանյութեր
Սահմանադրությունը փոխելու-չփոխելու հարց չկա, Փաշինյանին փոխելու հարց կա. Բագրատ Սրբազան
