Ձեր վստահելի աղբյուրը

«Շնորհակալություն եմ հայտնում քննիչին ու դատախազին այս քրեական վարույթը նախաձեռնելու համար, որի արդյունքում իրենք հայտնվելու են մեղադրյալի աթոռին։ Վստահ եմ, որ իրենք իրենց հետ դատարան կբերեն Նիկոլ Փաշինյանին, Վահե Գրիգորյանին, ՍԴ բազմաթիվ դատավորների մեղադրյալի կարգավիճակով»,- դատական նիստից հետո լրագրողներին ասաց հասարակական-քաղաքական գործիչ Էդգար Ղազարյանը, ում  մեղադրանք է առաջադրվել 490-րդ հոդվածի երկրորդ մասով՝ դատավորներին արատավորելն իրենց գործունեության համար, և դատարանը քննում էր խափանման միջոցի հարցը։

Նա ընդգծեց, որ ոչ մի մարդ չի կարող Հայաստանում խոսք ասելու համար պատժվել, բացի նրանցից, ում խոսքը համընկել է թշնամու ղեկավարների խոսքին, որոնք իրականացրել են պետական դավաճանություն։

Էդգար Ղազարյանն ասաց, որ բողոքարկելու են ստորագրություն չհեռանալու մասին միջնորդությունը, բողոքարկելու են իր կարգավիճակը։  

«Երեկ քննչականում ուզում էին իմ հեռախոսն առգրավել։ Ես հո ձեր Աղազարյան Հովիկը չեմ, որ հեռախոսս առգրավեք, տանեք, քսերոքս անեք, բաժանեք ՔՊ պատգամավորներին, ինչ գործ ունեք իմ հեռախոսի հետ»,- նշեց նա։ 

Հիշեցնենք, որ Էդգար Ղազարյանին մեղադրանք է առաջադրվել ՔՕ 490-րդ հոդվածի երկրորդ մասով՝ դատավորներին արատավորելն իրենց գործունեության համար,  ենթադրում  է 2-5 տարի ազատազրկում:

Էդգար Ղազարյանի դեմ հարուցված քրեական գործով խափանման միջոցի հարցը քննում  է  դատավոր Գարիկ Աբելյանը։ Որոշումը կհրապարակվի փետրվարի 23-ին ժամը 10։00-ին։ Դատարանից պահանջվել է խափանման միջոց ընտրել՝ վարչական հսկողություն, ստորագրություն չհեռանալու մասին։  

Մանրամասն՝ տեսանյութում։