Ձեր վստահելի աղբյուրը

«Եթե մարդը կատարել է որևէ արարք, դրան  համապատասխան գնահատական պետք է տրվի անկախ նրանից, ես հիմա ՔՊ-ում եմ, ՔՊ-ում չեմ, օրենքն ինչ կապ ունի դրա հետ»,- «ավտոբուսի գործով» դատական նիստից հետո ասաց ԱԺ անկախ պատգամավոր, ՔՊ խմբակցության նախկին անդամ Հակոբ Ասլանյանը։

Նա նշեց, որ ոչ մեկ իրավունք չունի անձնական վիրավորանք հասցնելու որևէ մեկին։

«Կա քննադատության աստիճան, թող քննադատի, ոչ թե անձնական ասի։  Մարդը կարող է մոտենալ, ասել՝ դուք սխալ եք անում, սխալ եք կառավարում, բայց ոչ թե ասի` «նիկոլական վիժվածք» կամ այլ բառեր, դա արդեն անձնական է, դա խուլիգանություն է»,- ասաց Ասլանյանը։

Հարցին՝ արդյոք իր նախկին թիմակիցները, եթե հիմա լիներ միջադեպը, կդատապարտեին, նա պատասխանեց. «Ինձ դա չի հետաքրքրում, ինձ հետաքրքրում է այն, որ անձամբ իմ անձն է վիրավորել, ինձ որոշակի պիտակավորել է, ուրեմն թող պատասխան տան օրենքի առջև»։ 

Հիշեցնենք, որ ավտոբուսում Հակոբ Ասլանյանի հետ միջադեպի փաստով մեղադրանք է առաջադրվել Սամվել Վարդանյանին խուլիգանություն կատարելու ու անհանդուրժողականություն հրահրելու համար։