«Ժողովուրդ». Ինչու է դժվար կամ անհնար «հատիկ-հատիկ» օպերացիայով բռնագանձման գործընթացը
«Ժողովուրդ» թերթը գրում է.
«Սոցհարթակներում Նիկոլ Փաշինյանի սկսած «հատիկ-հատիկ» օպերացիայով դեռ որևէ գույք չի բռնագանձվել: Բոլոր դեպքերում գույքի սեփականատերը, տարատեսակ ճնշումներից ելնելով, իր սեփականությունը նվիրաբերել է պետությանը: Իսկ ինչու է դժվար կամ անհնար բռնագանձման գործընթացը:
«Ժողովուրդ» օրաթերթը հիշեցնում է, որ «Ապօրինի ծագում ունեցող գույքի բռնագանձման մասին» օրենքն ընդունվել է ԱԺ ՔՊ խմբակցության կողմից 2020 թվականի ապրիլի 16-ին, որը 2022 թվականի նոյեմբերի 23-ին ընդդիմադիր 2 խմբակցությունները բողոքարկեցին Սահմանադրական դատարանում: ՍԴ-ն ամիսներ շարունակ ուսումնասիրում էր դիմումը և վարույթ չէր ընդունում: Ի վերջո, կայացրեց աշխատակարգային որոշում՝ հարցեր ուղարկել ՀՀ դատախազությանը և մասնագիտական կարծիք ստանալու համար դիմել Վենետիկի հանձնաժողովին ու կասեցնել վարույթի քննությունը:
Դատախազությունը 2023-ին արդեն պատասխանել է ՍԴ հարցերին: Իսկ Վենետիկի հանձնաժողովը, որը հանդիսանում է Եվրոպական կոնվենցիայի և սահմանադրության համապատասխանության հարցերը որոշող կարևորագույն օղակ, ՀՀ ՍԴ-ի դիմումի մասով տվել է մասնագիտական կարծիք, ըստ որի՝ օրենքը, ընդհանուր առմամբ, համապատասխանում է ՀՀ Սահմանադրությանը, բայց բոլոր այն հիմքերը, հոդվածները, որոնց հիման վրա այսօր ՀՀ դատախազությունը բռնագանձումներ է տարածում, Վենետիկի հանձնաժողովը ճանաչել է Եվրոպական կոնվենցիային հակասող: Ավելին՝ կան նաև Եվրադատարանի հստակ նախադեպեր այս հարցի վերաբերյալ, որի մասին՝ հաջորդիվ:
Իսկ ինչու ՍԴ-ն չի կայացնում որոշում` շարունակելով կասեցված պահել վարույթի քննությունը. այն պարզ պատճառով, որ դատավորները գիտեն` օրենքը հակասահմանադրական է, և չեն կարող իրենց վրա պատասխանատվություն վերցնել օրենքը Սահմանադրությանը համապատասխան հռչակելու առումով՝ Վենետիկի հանձնաժողովի փաստացի բացասական կարծիքի առկայության պայմաններում:
ՀՀ Կառավարության՝ «Ժողովուրդ» օրաթերթի աղբյուրները հայտնում են, որ ՍԴ-ն դիմել է Վենետիկի հանձնաժողով` ըստ էության հիմք ընդունելով դատավոր Վահե Գրիգորյանի երաշխիքները, որ Վենետիկը կտա դրական եզրակացություն: Բայց իշխանության ակնկալիքները չեն իրականացել, և նրանք հայտնվել են փաստի առջև: Մի կողմից, եթե շարունակեն բռնագանձումները, ապա այն կհակասի ԵԿ-ին, և 1-2 տարի հետո բոլոր այդ անձինք, ՄԻԵԴ-ին դիմելու եղանակով, մի քանի անգամ ավելի փոխհատուցումներ կստանան պետությունից, մյուս կողմից շարունակում են բռնագանձման հայցերով դատարաններ մտնել առանց ՍԴ որոշման, որովհետև այս գործընթացի վրա է հիմնված Նիկոլ Փաշինյանի կառավարման՝ «թալանածը հատիկ-հատիկ» հետ բերելու PR-ը: Եվ մինչ օրս չկա օրինական ուժի մեջ մտած դատավճիռ»։
Մանրամասները թերթի այսօրվա համարում:
Լրահոս
Տեսանյութեր
Մենք ԵԱՏՄ անդամ ենք, դուք արդեն իսկ ամուսնացած մարդու եք մոտեցել. Մամիջանյանը՝ ԵԽ պատգամավորին
