Ձեր վստահելի աղբյուրը

Գյումրիում ադրբեջանական ֆիլմերի փառատոնը չի կայանա: Դրա բացումը նախատեսված էր այսօր ժամը 15-ին: Վաղ առավոտից քաղաքում փառատոնի դեմ բողոքի են դուրս եկել քաղաքի բնակչությունը, ինչպես նաև տարբեր կազմակերպությունների ներկայացուցիչներ:

Բողոքի ակցիային մասնակցելու նպատակով Երևանից Գյումրի ևս մեկնողներ են եղել: Ակցիայի մասնակիցները վեր էին պարզել ադրբեջանցիների կողմից Մարաղայի, Սումգայիթի ոճրագործությունները դատապարտող ցուցապաստառներ, Հայաստանի դրոշներ:
Հիշեցնենք, որ ընդամենը երկու օր առաջ Հայաստանում հարգեցին հայաբնակ Մարաղա բնակավայրում ադրբեջանցիների կողմից սպանված ավելի քան 50 հայերի հիշատակը:

Ակցիային, ինչպես երևում է սոցիալական ցանցերում տարածված նկարներից, մասնակցում են նաև Գյումրու քաղաքապետ Վարդան Ղուկասյանը: Այժմ Գյումրիում իրավիճակը հանդարտվել է:

Բլոգեր Տիգրան Քոչարյանը Գյումրիից հեռախոսով Panorama.am-ին փոխանցեց, որ փողոց էին դուրս եկել բազմաթիվ մարդիկ: Գյումրիում եղել է Գեորգի Վանյանը, ում ոստիկանները համոզել են լքել տարածքը: Ոստիկաններին հրավիրողն էլ եղել է Ժուռնալիստների «Ասպարեզ» ակումբի ղեկավար Լևոն Բարսեղյանը, ով փառատոնի անցկացման համար տարածք էր տրամադրել:

Փառատոնի բացմանը մասնակցելու համար լրագրողներին ու հյուրերին Երևանից Գյումրի տեղափոխող տրանսպորտային միջոցն այդպես էլ Գյումրի չհասավ: Փոխարենը Գյումրի հասավ, հետ եկավ ու Արթիկ-Մարալիկ հատվածում կես ժամ շարունակ սպասող մարդկանց պարզաբանում ներկայացրեց փառատոնի կազմակերպիչ Գեորգի Վանյանը:

Նա ներողություն խնդրեց լրագրողներից ու հյուրերից, հայտարարեց, որ փառատոնը չի կայանալու: Նրա խոսքով, նման որոշում կայացվել է կես ժամ առաջ:

«Քաղաքացիների անվտանգությունն ապահոված չէր: Հնարավոր էր արյունահեղություն: Անկառավարելի ամբոխը ղեկավարվում էր քաղաքային ու մարզային իշխանությունների կողմից»,-արդարացավ Վանյանը, հավելելով, թե տեղի ունեցածի վերաբերյալ ավելի ուշ հաղորդագրություն կտարածի:

Վերադարձին լրագրողների ու հյուրերի խմբին Վանյանը հրավիրել է «Հացատուն» ռեստորանային համալիր, որտեղ մտադիր է նրանց համար ցուցադրել ադրբեջանական ֆիլմերը: «Դա արդեն իր պրոբելմն է, ինքը չկարողացավ փառատոնը անցկացնել Գյումրիում, դրանից հետո կարող է իր տանն էլ էդ ֆիլմերի դիտում անցկացնել»,-արձագնքեց Տիգրան Քոչարյանը:

Նրա խոսքով, Վանյանն ուղղակի ստում է, երբ ասում է` փառատոնի անցկացման համար դրամական միջոցներ տրամադրում են ԱՄՆ-ն ու Մեծ Բրիտանիան: «Ես հավաստի ինֆորմացիա ունեմ, 2009 թվին Մեծ Բրիտանիայի դեսպանատունը դադարեցրել է նրա ֆինանսավորումը: Փաստորեն ինքը ստում է: Ես իմ խոսքերի համար պատասխանատու եմ»,-ասաց «Փիղ» անունով հայտնի բլոգերը:

Նշենք, որ փառատոնի բացման դեմ հայտարարություններով հանդես էին եկել «Հայազն» միությունը, ՀՅԴ երիտասարդները, բլոգերներ: Նրանցից Տիգրան Քոչարյանն անգամ բաց նամակ էր հղել http://panorama.am/am/current_topics/2012/04/11/qocharyan-letter-hefern/ ԱՄՆ դեսպանին: Հիշեցնենք, որ փառատոնն իրականացվելու էր ԱՄՆ կողմից տրամադրված դրամաշնորհի շրջանակում:

Փառատոնի չկայանալու փաստը մեծ ոգևորությամբ ընդունվեց «Ֆեյսբուք» սոցցանցի հայ օգտատերերի կողմից` հիացական ու սատարող բացականչություններ: Նրանցից մեկը միայն նկատել էր. «Только что вернулся из министерства культуры там даже не знали о чем идет речь, ребята ждут чтобы перерыв закончился»: