Ձեր վստահելի աղբյուրը

Նախագահ Սերժ Սարգսյանն այսօր ՀՀ կառավարությունում հրավիրել է խորհրդակցություն, որին մասնակցել են գործադիր մարմինների ղեկավարները՝ վարչապետի գլխավորությամբ, ՀՀ նախագահի և կառավարության աշխատակազմերի ղեկավարները, ՀՀ գլխավոր դատախազը, Երևանի քաղաքապետը, ՀՀ օրենքներով ստեղծված մշտապես գործող մարմինների ղեկավարները և ՀՀ ԳԱԱ նախագահը:

ՀՀ նախագահի վերահսկողական ծառայության ղեկավար Հովհաննես Հովսեփյանը ներկայացրել է գնումների գործընթացի իրականացման վերաբերյալ ՀՀ նախագահի վերահսկողական ծառայության ուսումնասիրության հիմնական արդյունքներն ու եզրակացությունները:

ՀՀ նախագահի վերահսկողական ծառայության եզրակացությամբ՝ գնումների համակարգում մասնակիցների կողմից թույլ են տրվում մի շարք երևույթներ, որոնք տարբերվում են գնումների մասին օրենսդրությամբ սահմանված պահանջներից և սկզբունքներից: Լիազոր մարմինները լիարժեքորեն չեն իրականացնում իրենց պարտականությունները, իսկ պատվիրատուները բացի իրենց պարտականությունները լիարժեքորեն չկատարելուց, օգտվելով ենթաօրենսդրական բացերից, որոշ դեպքերում գործում են կամայականության դաշտում՝ չապահովելով մրցակցային, արդյունավետ և թափանցիկ գնման ընթացակարգեր:

Նախագահն իր խիստ դժգոհությունն է արտահայտել բարձրացված խնդրում բոլոր պատասխանատուների աշխատանքից: Նա մասնավորապես նշել է.

«Այս առումով ես կառավարության աշխատանքը, Տիգրան, շատ բացասական եմ գնահատում: Մենք 4 տարի է քեզ հետ խոսում ենք էս թեմաներով, ուղիղ, չորս տարի է, բայց պրոցեսները շարունակվում են. 6 ամիս հետո լավ կլինի, մեկ տարի հետո լավ կլինի:  Գոնե տեխնիկական խնդիրները կարո՞ղ ենք լուծել, կանոնակարգերը կարո՞ղ ենք գրել, հետո գնալ էն մարդկանց հետևից, ովքեր ատկատներ են վերցնում, մատակարարներից էսպես ասած՝ պարտքեր են վերցնում, գնալ էն մարդկանց հետևից, ովքեր իրենց քեռու տղային են բերում տենդերում հաղթեցնում, չգիտեմ, կրկնակի ավել գներով:

Եթե վերցնենք վերջին 2-3 տարում կատարված շինարարական աշխատանքները, կտեսնենք ինչքան են թանկացել այդ աշխատանքները, ճանապարհաշինական աշխատանքները: Եվ տարօրինակ է, մենք տենդերով ապրանք ենք ձեռք բերում, որը շուկայում ավելի էժան է: Մեկը դրա համար պետք է պատասխան տա՞, թե՞ չէ: Թե՞ անպայման պետք է մարդ ձերբակալենք, անպայման Խաչիկյանի պատմությունը մեջտեղ բերենք:

Այն ժամանակ էլ  ասում էինք՝ լսեք, թոշակները կարգավորեք, նպաստները կարգավորեք… բոլորն ասում էին կարգին է, էստեղ բան չկա… Վերջում պարզվեց, որ տարեկան 11-12 միլիարդ այնտեղից կարող էինք տնտեսում ասնել: Անթույլատրելի է, անթույլատրելի: Պիտի կարողանանք այս պրոցեսը կարգավորել, հետո անցնել մնացած խնդիրներին:

Մեկ աղբյուրից կատարած գնումներում ես խնդիր չեմ տեսնում, օպերատիվության համար դա կարելի է անել, բայց պետք է անել մարդավարի՝ բոլոր պահանջները պահպանելով, շուկան ուսումնասիրելով՝ համեմատելով և վերջում՝ արդյունքում ասելով՝ տեսեք, մի աղբյուրից արեցինք, որևէ բանով չի տարբերվում, եթե տարբերվում է, դեպի էժանն է տարբերվում:
Հարյուր բան կարող է լինել՝ փլուզում, վթար. պարտադի՞ր է այս բոլորը դնել և տենդերներ անցկացնել: Բայց արդեն գիտենք, որ վատ բան է կատարվում, դրա համար ամեն անգամ ասում ենք մի աղբյուրից...Եթե ասում ենք մի աղբյուրից, էդ նշանակում է՝ գողացան մի մասը: Դա փնթի վերաբերմունք է, փնթի»: