Ձեր վստահելի աղբյուրը

Ռուսաստանի արտգործնախարար Սերգեյ Լավրովը վաղը մեկնելու է Պեկին և Չինաստանի ղեկավարության հետ երկկողմ հետաքրքրություն ներկայացնող բազմաթիվ հարցերին զուգագեռ քննարկելու է նաև Ուկրաինայում ստեղծված իրավիճակը: 

Չինական կողմը բավականին հավասարակշռված դիրքորոշում է որդեգրել ուկրաինական ճգնաժամի սկզբից ի վեր:

Ուկրաինայում ստեղծված ճգնաժամի սկզբնական շրջանում Չինաստանի ղեկավար Սի Ձինպինը ԱՄՆ-ի նախագահ Բարաք Օբամայի հետ քննարկելով Ուկրաինայում ստեղծված իրավիճակը հայտարարել էր, որ ուկրաինական ճգնաժամի բոլոր կողմերը պետք է գործեն հանգիստ և զուսպ, որպեսզի խուսափեն լարվածության աճից:

Իր հերթին, Չինաստանի արտգործնախարար Վան Ին անդրադառնալով Ուկրաինայում ստեղծված քաղաքական ճգնաժամին հայտարարել էր, որ Պեկինը կոչ է անում Ուկրաինայում ստեղծված իրավիճակը հանգուցալուծել քաղաքական ճանապարհով:

«Չինաստանը պատրաստվում է կառուցողական դերակատարում ունենալ ուկրաինական խնդրի քաղաքական լուծման գործում»,-նշել էր Չինաստանի արտգործնախարարը:

Չինաստանը մինչև ուկրաինական ճգնաժամի ծագումը բավականին ակտիվ առևտրա-տնտեսական և ռազմա-քաղաքական հարաբերություններ էր զարգացնում Ուկրաինայի հետ: Պեկինը Ուկրաինայում ուներ իր հստակ տնտեսական և աշխարհաքաղաքական շահերը:

2013թ.-ին դեկտեմբերին Ուկրաինայի նախագահ Վիկտոր Յանուկովիչը պետական այցով գտնվելով Պեկինում չինական կողմի հետ ստորագրել էր 20-ից ավել համաձայնագրեր: Վ. Յանուկովիչը նշել էր, որ իր այցի ընթացքում ստորագրված համաձայնագրերը թույլ կտան Ուկրաինային ներգրավել 8 միլիարդ դոլարի հասնող չինական ներդրումներ:

Ուկրաինայի պետական վիճակագրական ծառայության տվյալներով, 2013թ.-ին երկրի ամենախոշոր առևտրային գործընկերներ են Ռուսաստանը՝38.2 միլիարդ դոլար, Չինաստանը՝10.6 միլիարդ դոլար և Գերմանիան՝8.4 միլիարդ դոլար: Ուկրաինան Չինաստանի հետ առևտրային հաշվեկշռում ունի 6 միլիարդ դոլարի հասնող բացասական սալդո, այսինքն, Կիևը ավելի շատ ապրանքներ է գնում Չինաստանից, քանս թե վաճառում: 

Ռուս-չինական ռազմավարական կապերի և միջազգային հարթակներում միմյանց աջակցելու մասին է փաստում նաև այն հանգամանքը, որ ՄԱԿ-ում Ղրիմի հանրաքվեի հետ կապված քվեարկության ժամանակ Ռուսաստանը վետո էր կիրառել Ղրիմի հանրաքվեն անօրինական ճանաչող բանաձևի նկատմամբ, իսկ Պեկինը ձեռնպահ է մնացել Մոսկվայի դեմ ուղղված բանաձևին միանալուց:

ՄԱԿ-ում Չինաստանի ներկայացուցիչ Լյու Ցզեին անդրադառնալով Ղրիմի վերաբերյալ բանաձևին նշել էր, որ Անվտանգության խորհրդի կողմից Ղրիմի հանրաքվեն դատապարտող բանաձևի ընդունումը կարող էր էլ ավելի բարդացներ Ուկրաինայում ստեղծված լարված իրավիճակը և այդ պատճառով Չինաստանը հրաժարվել է մասնակցել քվեարկությանը: Չինաստանի հավասարակշռված և հակառուսական բանաձևերին միջազգային հարթակներում չմիանալու դիրքորոշումը պայմանավոված է ռուս-չինական տնտեսական շահերով և ԱՄՆ-ի ազդեցության ընդլայնումը զսպելու Պեկինի քաղաքականությամբ:

Նախորդ շաբաթ երկօրյա աշխատանքային այցով Պեկինում էր գտնվում Ռուսաստանի փոխվարչապետ Արկադի Դվորկովիչի պատվիրակությունը՝ ռուսական ամենախոշոր ընկերությունների՝«Գազպրոմի», «Ռոսնեֆտի», «ՆՕՎԱՏԷԿ»-ի, «Ռուսալի» ներկայացուցիչների ուղեկցությամբ:

Չինական կողմի հետ քննարկվել է Ռուսաստանից արևելյան ուղղությամբ դեպի Չինաստան գազի առաքման հարցերը, իսկ «Ռոսնեֆտը» նպատակ ունի ավելացնել Չինաստան ծովային ճանապարհով առաքվող նավթի ծավալները մի քանի միլիոն տոննայով:

Պուտինը փետրվարին Սոչիում Չինաստանի առաջնորդ Սի Ձինպինի հետ կայացած հանդիպման ժամանակ գնահատելով ռուս-չինական արդի հարաբերությունները նշել էր, որ համատեղ նախագծերի կյանքի կոչման շնորհիվ երկկողմ ապրանքաշրջանառությունը կհասնի 100 միլիարդ դոլարի, իսկ միջնաժամկետ հեռանկարում՝150 միլիարդ դոլարի:

Չինաստանի գլխավոր պետական մաքսային ծառայության տվյալներով, ՌԴ-Չինաստան ապրանքաշրջանառությունը 2013թ.-ին ավելացել է 1.1%-ով և հասել է 89.1 միլիարդ դոլարի:
Ռուսաստանը Չինաստան է արտահանում հիմնականում հումք՝ նավթը, նավթամթերքները և այլ հումքը կազմել է Չինաստան արտահանման 67.8%-ը, 7%-ը բաժին է ընկնում անտառափայտին:

Չինաստանը Ռուսաստան է արտահանում մեքենաներ և սարքավորումներ՝ 45%, կաշվից պատրատսված իրերի արտահանումը ավելացել է 66%-ով, տեսքտիլը՝ 58%-ով: 

Արտյոմ Բալասանով

Նախորդիվ՝

Արևմուտքի պատժամիջոցների ֆոնին Մոսկվան սերտացնում է էներգետիկ կապերը Չինաստանի հետ

Չինաստանը չի միջամտելու Ուկրաինայի ներքին գործերին և կշարունակի զարգացնել ռազմավարական կապերը Կիևի հետ

Չինաստանը կողմ է Ուկրաինայում ձևավորված իրավիճակի կառուցողական կարգավորմանը