Իրավապաշտպան կազմակերպությունները հանդես են եկել ի պաշտպանություն լրտեսության մեջ մեղադրվող ադրբեջանցի լրագրող Ռաուֆ Միրկադիրովի
Լրագրող Ռաուֆ Միրկադիրովի` Թուրքիայից արտաքսվելուց անմիջապես հետո տեղի ունեցած ձերբակալությունը Ադրբեջանում այդ երկու երկրների համաձայնեցված գործողության տարրեր է պարունակում, ինչը միջազգային իրավունքի խախտում է: Այս մասին ասվում է «Human Rights Watch» միջազգային իրավապաշտպան կազմակերպության հայտարարությունում:
«Human Rights Watch»-ը գտնում է, որ առանց փաստաբանին հանդիպելու հնարավորության լրագրողին Ադրբեջան արտաքսելով` Թուրքիան խախտել է իր միջազգային պարտավորությունները:
«Human Rights Watch»-ի տնօրենի՝ Եվրոպայի և Կենտրոնական Ասիայի հարցերով տեղակալ Ռեյչել Դենբերը նշել է, որ Թուրքիայի և Ադրբեջանի միջև հնարավոր համաձայնեցված գործողությունները պետք է մանրակրկիտ կերպով ստուգվեն: «Միրկադիրովը պետք է ազատ արձակվի մինչ իր գործի անկախ քննությունը»,- ասել է նա:
Ըստ Դենբերի` թուրքական իշխանությունները առանց որևէ հիմքերի կալանավորել են լրագրողին և անօրինական կերպով նրան վերադարձրել են Ադրբեջան:
«Օրենքի նման կոպիտ խախտումը պետք է հետաքննվի, և մեղավորները պետք է պատասխանատվության ենթարկվեն»,- ասել է նա:
Կազմակերպության հայտարարությունում նշվում է, որ Միրկադիրովը քաղաքական հոդվածներ էր գրում և հաճախ քննադատել է Ադրբեջանի և Թուրքիայի իշխանությունների քաղաքականությունը, հատկապես մարդու իրավունքների խախտումները: Բացի այդ, նա մասնակցել է Հայաստանի և Ադրբեջանի միջև անցկացվող «ժողովրդական դիվանագիտության» նախաձեռնություններին:
Միրկադիրովի ձերբակալությունը տեղի է ունեցել Ադրբեջանի` Եվրոպայի խորհրդի նախարարների կոմիտեի նախագահությունը ստանձնելուց ընդամենը մի քանի շաբաթ առաջ: Ըստ «Human Rights Watch»-ի` 2001թ.-ին Եվրոպայի խորհրդի անդամ դառնալուց ի վեր Ադրբեջանը խախտել է անդամակցության շրջանակներում ստանձնած բազմաթիվ պարտավորություններ:
Միայն անցյալ տարի Ադրբեջանի իշխանությունները շինծու մեղադրանքներով ձերբակալել են տասնյակ քաղաքական ակտիվիստների, բլոգերների և կառավարության այլ քննադատների: Առնվազն ինը լրագրող և չորս Facebook-յան ակտիվիստ ճաղերի հետևում են գտնվում:
«Միրկադիրովի ձերբակալության համատեքստը և ժամանակահատվածը հիմքեր են տալիս կարծելու, որ նրա դեմ գործ է հարուցվել քաղաքական դրդապատճառներով: Այն նպատակաուղղված է պատժելու Միրկադիրովին իր կարծիքը արտահայտելու համար, ինչպես նաև նախազգուշացնելու մնացած այլախոհներին»,- ընգծել է Դենբերը:
Ամփոփելով` նա նշել է, որ Եվրոպայի խորհուրդը և նրա անդամ երկրները պետք է կոչ անեն Ադրբեջանին ազատ արձակել Միրկադիրովին և կատարել իր միջազգային պարտավորությունները:
«Freedom House» իրավապաշտպան կազմակերպությունը նույնպես իր մտահոգությունն է հայտնել լրագրողի արտաքսման և լրտեսության մեղադրանքի հետ կապված:
«Թուրքիայի` Ռաուֆ Միրկադիրովին արտաքսելու որոշումը և Թուրքիայի վարչապետ Էրդողանի` Բաքու այցելությունից անմիջապես հետո նրա անհապաղ ձերբակալությունը Ադրբեջանում շատ կասկածելի է: Ադրբեջանի և Թուրքիայի կառավարությունները պարտավոր են ապահովել Միրկադիրովի անվտանգությունը, իսկ նրա դեմ հարուցված մեղադրանքները պետք է չեղյալ համարվեն»,- նշել է «Freedom House» տնօրեն Դևիդ Կրամերը:
Նախօրեին ԱՄՆ Պետդեպարտամենտի մամուլի քարտուղար Ջեն Փսակին նույնպես խոսել է Ռաուֆ Միրկադիրովի ձերբակալության մասին: Նա նշել է, որ ԱՄՆ-ն ուշադրությամբ հետևում է գործընթացին: «Մենք մտահոգված ենք այն տեղեկատվությամբ, որ նրա դեմ հարուցված մեղադրանքները կարող են պայմանավորված լինել Միրկադիրովի` Ադրբեջանի կառավարությանը քննադատելու, ինչպես նաև տարածաշրջանում վստահության մթնոլորտ ստեղծելուն ուղղված «ժողովրդական դիվանագիտության» նախաձեռնություններին մասնակցելուփաստով »,- ասել է Փսակին:
Նշենք, որ «Զերկալո» ադրբեջանական թերթի լրագրող Ռաուֆ Միրկադիրովին ձերբակալել են ապրիլի 18-ին Անկարայում, ըստ ոստիկանության` փաստաթղթերի ժամկետանց լինելու պատճառով: Ապրիլի 19-ին Միրկադիրովին արտաքսել են Ադրբեջան, որտեղ նա անմիջապես ձերբակալվել է և նախնական կալանքի տակ առնվել պետական դավաճանության կասկածանքով: Ապրիլի 21-ին Բաքվի դատարանը նրան երեք ամսվա նախնական կալանք է տվել: Միրկադիրովը մեղադրվում է Հայաստանի հատուկ ծառայությունների հետ համագործակցության մեջ. մասնավորապես, նրան մեղադրում են երեք տարբեր վայրերում 2008-ից 2009 թվականներին Հայաստանի հատուկ ծառայություններին պետական գաղտնիք համարվող ռազմական տեղեկատվության տրամադրման մեջ, այդ թվում Ադրբեջանի զինված ուժերի տեղակայման վայրերի մասին:
Նախորդիվ`
«Լրագրողների պաշտպանության կոմիտեն» և Բաքվում ԱՄՆ դեսպանատունը մտահոգված են ադրբեջանցի լրագրող Միրկադիրովի ձերբակալությամբ
Անսպասելի էր, որ իմ անունը կապվում է պետական դավաճանության լուրջ մեղադրանքի հետ. Բաղդասարյանը` ադրբեջանցի լրագրողի կալանքի մասին
Ադրբեջանում ձերբակալված լրագրող Միրկադիրովը հերքում է պետական դավաճանության մեջ իրեն առաջադրած մեղադրանքները
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
