Ձեր վստահելի աղբյուրը

«Մենք Ռուսաստանի հետ ունենք երկկողմ բարեկամության պայմանագիր, գտնվում ենք անվտանգության միևնույն համակարգում, գումարած դրան Մաքսային միությունը որոշակի առավելություններ է տալիս անդամ երկրներին, օրինակ Հայաստանին` ներկրել մրցունակ գներով էներգակիրներ, ինչը  թույլ է տալիս մեր սահմանափակ հնարավորությունների սահմաններում ունենալ մրցունակ ապրանքներ: Սա է մեր որոշման ելակետը, շարժառիթը»,-ասաց Հայաստանի նախագահ Սերժ Սարգսյանը Ֆրանսիայի նախագահ Ֆրանսուա Օլանդի հետ համատեղ ասուլիսի ժամանակ՝ պատասխանելով ֆրանսիացի լրագրողի հարցին, թե ինչպե՞ս կբացատրեք Ձեր դիրքորոշումը Մաքսային միությանն անդամակցելու հարցում:

Հիշեցնենք, որ Ֆրանսիայի նախագահ Ֆրանսուա Օլանդը երկօրյա պետական այցով Հայաստան է ժամանել նախօրեին՝ նախագահ Սերժ Սարգսյանի հրավերով:

Սերժ Սարգսյանի խոսքով, հայ-ռուսական ջերմ հարաբերությունների հիմքը դարավոր բարեկամությունն է, հայերն ու ռուսները շատ երկար ժամանակ ապրել են մի պետության, մի պետականության մեջ, կապված են մշակույթով, տնտեսական հարաբերություններով. «Սա է այսօրվա մեր հարաբերությունների հիմքը: Կարծում եմ, որ որևէ մեկի համար տարօրինակ չէր Հայաստանի ցանկությունն անդամակցել Մաքսային միությանը, որովհետև, իրոք, տնտեսական փոխկապակցվածությունը այսօր շատ բարձր մակարդակի վրա է:

Նախագահ Սերժ Սարգսյանը նաև ասաց, որ Մաքսային միության անդամակցությունը չի նշանակում, որ Հայաստանը դադարեցնում է ԵՄ հետ հարաբերությունները:

«Ցանկալի կլինի, որ ասոցացման առանձնակի առաջարկություն լինի Հայաստանի համար: Այնպես որ, մենք շարունակում ենք Եվրամիության հետ մեր հարաբերությունների խորացումը, որովհետև այդ հարաբերությունները ոչ միայն հնարավորություն են` վերադառնալու մեր արմատներին, այլ նաև արագ բարեփոխումներ իրականացնելու մեր երկրում»,- նշեց Սերժ Սարգսյանը: