Ձեր վստահելի աղբյուրը

ՀԱԿ խմբակցության անդամ Նիկոլ Փանիշյանը, բնական է, չէր կարող չօգտագործել առիթը և Երևանի փոխքաղաքապետ Կամո Արեյանից չհետաքրքրվել Անաստաս Միկոյանի արձանի տեղադրման մասին: 2013թ-ի պետական բյուջեի կատարողականի քննարկման ժամանակ պատգամավորը, մասնավորապես, հետաքրքրվեց` «Երևանի քաղաքապետարանը և ավագանին այս արձանը տեղադրելով ինչ ուղերձ են ուզում հանրությանը փոխանցել: Առավել ևս, որ շրջանառվում է մի փաստաթուղթ, որը Ա.Միկոյանին ներկայացնում է ոչ լավ լույսի ներքո»:

«Ես կհասկանայի, եթե քաղաքապետարանը նախաձեռներ մարտի 1-ի զոհերի արձանի տեղադրումը Երևանում, որոնք գնդակահարվել են հենց քաղաքապետարանի հարևանությամբ: Բայց ստացվում է, որ ոչ թե գնդակահարվողների, այլ գնդակահարողների արձանն է նպատակահարմար տեղադրել»,- նշեց ընդդիմադիր պատգամավորը` հղում անելով հայտնի փաստաթղթին, որ շրջանառվում է համացացնում:

«Միկոյանի արձանի տեղադրման վերաբերյալ ստացվել է առաջարկություն, Երևանի ավագանին քննարկել և տվել է իր համաձայնությունը: Ինչ մնում է պատմագիտական ու այլ հարցերին, իրարամերժ գնահատականներին և այլն, դա պատմաբանների քննարկելիքն է, Միկոյանը պետական գործիչ է և, այնուամենայնիվ, մենք հակված ենք արձանի տեղադրմանը և ավագանին տվել է իր համաձայնությունը»,- արձագանքեց Կամո Արեյանը:

Ն.Փաշինյանը արձագանքեց ու ևս մեկ անգամ հետաքրքրվեց`Երևանում Միկոյանի արձանը տեղադրելով ինչ եք ուզում ասել մեզ` ՀՀ քաղաքացիներիս, և երբ է նախատեսվում իրականացնել այդ ծրագիրը: 

«Տեսեք, Միկոյանի անունը կապում են Կատինում 22 հազար լեհ սպանելու հետ, ինչպիսին կլինի ձեր արձագանքը, եթե մի օր Վարշավայում որոշեն տեղադրել Թալեաթի արձանը»,- հարցրեց Փաշինյանը Արեյանից:

«Թալեաթի անունն ու արձանը ինձ չի հետաքրքրում»,- նախ շեշտեց Երևանի փոխքաղաքապետը: Այնուհետ կրկնեց` արձաններ տեղադրելիս ուղերձներ չեն հղում, տեղադրման համար դրական եզրակացություն կա:

«Թե երբ կտեղադրվի` հայտնի չի, չեմ կարող ասել: Ֆինանսավորման աղբյուրը ևս պարզ չէ, էսքիզային նախագիծ դեռ չկա»,- նշեց նա ու հավելեց, որ մոտենում է բոլոր հարցերին հարգանքով, բայց հորդորեց պատգամավորներին բյուջեի քննարկումներից չշեղվել: