Ձեր վստահելի աղբյուրը

«Աստանան միայն Արցախի հարցի շուրջ Նազարբաևի կողմից Ալիևի նամակի մեջբերումը չէր, Աստանայում այլ բաներ ևս տեղի էին ունեցել»,- այսօր լրագրողների հետ հանդիպմանը կարծիք հայտնեց «Ժառանգություն» կուսակցության գլխավոր քարտուղար Ստյոպա Սաֆարյանը:

Նա նշեց, որ այնտեղ ընդունվել է մի որոշում, որտեղ խոսվում է Եվրասիական միությանը միանալու մասին. «Հայաստանին, մեղմ ասած, չթողեցին մտնել Մաքսային միություն: ՀՀ իշանությունները նախընտրում են այս մասին չխոսել, որովհետև դա հերթական ձախողումն էր: Իհարկե, Հայաստանն էլ շահագրգռված չէ ՄՄ մտնելով, քանի որ կարող էր նաև Եվրասիական միության հիմնադիր անդամ չլինել, ինչը հիմա վտանգված է»:

Ստյոպա Սաֆարյանի բնորոշմամբ, Հայաստանի նախագահը գնացել էր Աստանա հաշվարկով, որ հուլիսին պայմանագիրը կստորագրվի, Հայաստանը կկատարի օրենսդրական և ինստիտուցիոնալ բարեփոխումները վեց ամսում, կդառնա միության անդամ:

«Սերժ Սարգսյանի այս առաջարկը մերժվել է: Հուլիսի մեկը ոչ թե ստորագրման մասին ժամկետ է նշվել, այլ պայմանագրի նախապատրաստման: Այսինքն, անգամ հուլիսի մեկին չի ստորագրվի պայմանագիրը: Ոչ միայն Ղարաբաղի խնդրի հիշատակումը, այլև այս մերժումները հիմք էին, որ ՀՀ նախագահը չափազանց մտահոգ և վատ տրամադրությամբ վերադառնա Աստանայից»,- ասաց նա:

«Ժառանգություն» կուսակցության գլխավոր քարտուղարը հավելեց, որ պետք չէ միամիտ լինել և մտածել, որ այս խոչընդոտների հեղինակը Ղազախստանի նախագահ Նազարբաևը կամ Բելառուսի նախագահ Լուկաշենկոն է:

«Կրեմլին պետք չէ, որպեսզի Հայաստանը շուտ միանա Եվրասիական միությանը: Այս ամբողջ գործընթացը լավ կազմակերպված շոու է: Շահագրգռված չեն, որովհետև Պուտինն արդեն հասել է նրան, որ Ալիևը նամակներ է գրում իրենց: Շատերը նայում են այնպես, որ տրոյկան ավելի կարևորեց Ադրբեջանի շահերն ու մտահոգությունները, քան Հայաստանինը: Դա այդպես է: Որքան էլ Ադրբեջանը չի ձգվել դեպի Եվրասիական միություն, այս ամենը ցույց է տալիս, որ հայտնվել է Կրեմլի կախվածության ներքո: Կրեմլը դեռ չի լուծել Ադրբեջանին իր տոտալ ենթակայության տակ գցելու խնդիրը, իսկ քանի դեռ դա չի լուծվել, Հայաստանի միանալը կարող է ուշանալ»,- ասաց Ստյոպա Սաֆարյանը:

Անդրադառնալով Նազարբաևի կողմից Ադրբեջանի նախագահի նամակի հրապարակմանը, Ստյոպա Սաֆարյանն ասաց, որ մտածում էին, թե տեղում արձագանքելը լավ չէր, բայց հույս կար, որ Հայաստանը, թեկուզ ուշացումով, շատ դիպուկ կարտահայտվի:

«Ցավոք Հայաստանն այնքան ուժեղ չէ, որ կտրուկ հայտարարություն անի: Գոյություն ունի նույն Ղրիմի խնդիրը: Պետք էր գրագետ լինել և տեղում արձագանքել, որ քաղաքական բնույթի և սահմանների հարցերի լուծման ատյան չէր դա: Նույն Նազարբաևը պնդում էր, որ Եվրասիական միությունը լինի բացառապես տնտեսական բնույթի կառույց: Հայաստանի նախագահը պարտավոր էր ասել, որ սա կոնֆլիկտներ լուծող կազմակերպություն չէ: Իհարկե Ղրիմի հարցով զուգահեռներ չէր կարող տարվել, գոնե երկրորդ մասով պարտավոր էր արձագանքել»,- մանրամասնեց նա:

Ստյոպա Սաֆարյանը նկատեց, որ Հայաստանը երբեք վերապահում չի կատարել սահմանների հարցի վերաբերյալ, դա միշտ արել է Ադրբեջանը, եթե երկու երկրները եղել են նույն կառույցի անդամ:

Ըստ նրա, հիմա Հայաստանին քաշել են կեղտոտ խաղի մեջ. «Բարեբախտություն եմ համարում, որ այդ երկրները շահագրգռված չեն Եվրասիական միությանը Հայաստանի անդամակցելով: Ես չեմ կարծում, որ հուլիսի մեկին ինչ-որ հարց է լուծվելու: Այս խմորը շատ ջուր է քաշելու, մենք դեռ շատ ժամանակ ունենք»:

Նրա խոսքով, պետք է ի սպառ հրաժարվել այդ միությանն անդամակցելուց, բայց շարունակել խաղը խաղալ: Ստյոպա Սաֆարյանը հավելեց, որ Եվրամիության հետ մեր հարաբերություններն անորոշության մեջ են:

Հարակից հրապարակումներ`

Քոքոբելյանը Եվրասիականի մասին. Ինչո՞վ ենք մենք զբաղված այդտեղ

Սերժ Սարգսյան. Նազարբաևի հնչեցրածը տհաճ էր, բայց դա որևէ վնաս չի կարող մեզ տալ

Գագիկ Մինասյան. ՀՀ-ն և ԼՂՀ-ն մեկ միասնական տնտեսական տարածք են

Նազարբաևը միշտ ստանձնում է Ադրբեջանի հովանավորի դերը. Տաճատ Սարգսյան (տեսանյութ)

ՀՀ-ն և Արցախը գտնվում են մեկ միասնական տնտեսական տարածքում. Շարմազանով

Բնական է, որ Ղազախստանը պետք է հօգուտ Ադրբեջանի խոսեր. ԼՂՀ նախագահի մամլո խոսնակ

Հայաստանը չի կարող լինել Ղարաբաղից առանձին. Ն.Զոհրաբյան