Ձեր վստահելի աղբյուրը

«Մեր պետականության համար չափազանց վտանգավոր գործընթացներ»,- Եվրասիական տնտեսական միությանը Հայաստանի անդամակցության շուրջ զարգացումներն այսպես է բնութագրում «Համաձայնություն» կենտրոնի ղեկավար Դավիթ Շահնազարյանը:

«Նման սպառնալիք մեր անկախությանը 23 տարվա ընթացքում չի եղել: Այժմ Հայաստանը փորձում է մաս կազմել մի նոր միության, որն ինչպես էլ անվանեք, նորացող, ընդլայնվող ռուսական կայսրությունն է՝ այստեղից բխող բոլոր հետևանքներով: Եթե Հայաստանը գնում-դառնում է Ռուսաստանի բացարձակ վերահսկողության տակ գտնվող այդ կազմակերպության անդամ, ընտրությունները կրելու են պրոտոկոլային բնույթ, կոռումպացված համակարգը հավերժացվում է»,- այսօր «Հայաստանի գոյության մարտահրավերները՝ Եվրասիական միության նոր զարգացումների ներքո» թեմայով քննարկման ժամանակ ասաց նա:

Անդրադառնալով Ալիևի նամակի հնչեցմանը Ղազախստանի նախագահ Նազարբաևի կողմից, Դավիթ Շահնազարյանը նկատեց, որ Նազարբաևն ընդամենը տեղյակ է պահել այս նոր միությունում գործող խաղի կանոնների մասին:

Միևնույն ժամանակ նա նշեց, որ կառույցում ընդամենն ամրապնդվել է զուտ տնտեսական բաղադրիչը, իսկ քաղաքաղական բաղադրիչը, որ Ռուսաստանը ցանկանում էր մտցնել, չհաջողվեց:

«Հայտարարվեց հստակ, որ նոր միության տնտեսական սահմանները վերահսկվելու է վերպետական մարմնի կողմից: Դրանով է որոշվելու Հայաստանի տնտեսական տարածքը: Անդամակցելուց հետո ՀՀ և ԼՂՀ միասնական տնտեսական տարածքը չի լինելու և դրա վերահսկողությունը Հայաստանին չի պատկանելու, դա է ասվել և ասվել է հստակ»,- մեկնաբանեց նա :

Դավիթ Շահնազարյանը հավելեց, որ Հայաստան ասել էր, թե մենք պետք է դառնանք միության հիմնադիր անդամ. «Ոչ միայն դա չի լինելու, այլև անդամակցության հարցն էլ Հայաստանը չի որոշելու»:

Բանախոսը կարծում է, որ շատ լուրջ քայլեր են արվում, որ Ադրբեջանն անդամակցի այդ միությանը: Ռուսաստանն այդ նպատակի համար պատրաստ է զիջել ամենը, ինչ Ադրբեջանը կցանկանա:

«Ըստ էության, այդ միությունում մենք սուբյեկտ չենք, մենք Ադրբեջանի վրա ճնշում բանեցնելու գործիք ենք Ռուսաստանի ձեռքին: Ռուսաստանի գլխավոր նպատակն է՝ վերահսկողություն սահամանել Ադրբեջանի էներգետիկ քաղաքականության վրա և Ղարաբաղում տեղակայել ռուսաստանյան զորքերը՝ խաղաղապահ անվան տակ: Եթե Հայսատանն անդամակցեց այս ռուսական կայսրություն հանդիսացող կառույցին, ապա բանակցային գործընթացն ամբողջովին վարելու են ռուսները»,- նկատեց բանախոսը:

Դավիթ Շահնազարյանի բնորոշմամբ, կախված Ադրբեջանի արձագանքից, Մոսկվան կորոշի Հայաստանին ինչ արագությամբ և որ պահին դարձնել այդ միության անդամ:

Նա կոչ արեց քաղաքացիական հանրությանը քննարկումներ անել հարցի շուրջ և համախմբվել:

Հարակից հրապարակումներ`

Սաֆարյան. Կրեմլին պետք չէ, որ Հայաստանը շուտ միանա Եվրասիական միությանը

Քոքոբելյանը Եվրասիականի մասին. Ինչո՞վ ենք մենք զբաղված այդտեղ

Սերժ Սարգսյան. Նազարբաևի հնչեցրածը տհաճ էր, բայց դա որևէ վնաս չի կարող մեզ տալ

Գագիկ Մինասյան. ՀՀ-ն և ԼՂՀ-ն մեկ միասնական տնտեսական տարածք են

Նազարբաևը միշտ ստանձնում է Ադրբեջանի հովանավորի դերը. Տաճատ Սարգսյան (տեսանյութ)

ՀՀ-ն և Արցախը գտնվում են մեկ միասնական տնտեսական տարածքում. Շարմազանով

Բնական է, որ Ղազախստանը պետք է հօգուտ Ադրբեջանի խոսեր. ԼՂՀ նախագահի մամլո խոսնակ

Հայաստանը չի կարող լինել Ղարաբաղից առանձին. Ն.Զոհրաբյան